Folketingimut qinersinerup kingorna naalakkersuisuuffiit sisamat inuttalerneqanngitsut

Naaja H. Nathanielsen 2.000-ingajannik taaneqarluni parteeqanni Aaja Chemnitz taarserlugu Folketingimut ilaasortanngorpoq.

Naaja H. Nathanielsen qinersisartunit qinerneqarnini pissutigalugu inuussutissarsiornermut, aatsitassanut, nukissiuuteqarnermut, inatsisinut naligiissitaanermullu naalakkersuisutut tunuarpoq.

- Siullermik qinigaasut pilluaqqorusuppakka, inuiaqatigiit aallartitassatut toqqagaat, taakkulu sulilluarnissaannik aamma kissaappakka, naalakkersuisut siulittaasuat Jens-Frederik Nielsen, parteerisami IA-mit Naleqqamiillu ajorsartinneqarneranik misigisaqartoq, oqarpoq.

Naaja Nathanielsenip folketingimut ilaasortanngortut marluk ilaattut ilanngunneqarnera pissutigalugu, naalakkersuisut siulittaasuat Jens-Frederik Nielsen (D) naalakkersuisuuffinnik sisamanik maanna inuttaliinianngikkuni naalakkersuisooreersunut akisussaaffinnik tunioraasussanngorpoq.

Kingusinnerusukkut toqqaasoqassasoq

Illit suliassat pingaarutillit taakku qanoq isumagissavigit?

- Naalakkersuisuni anguniakkat soorunami pingaarnerpaat ilaanniippoq patajaassuseq, naalakkersuisuni patajaatsumik ingerlatsineq.

- Maannakkulli uunga killippugut taakku naalakkersuisoqarfiit nutaanik inuttalerneqartussanngorlutik, taakkulu suleriaaseq malillugu inatsisartuni katersuunneq aallartippat ivertinneqassapput, Jens-Frederik Nielsen Qanoruumut qinersinerup aqaguani oqarpoq.

Bentiaraq Ottosenip isumaginninnermut, suliffeqarnermut, nunamut namminermut avatangiisinullu naalakkersuisutut novembarimi tunuarnera pissutaalluni atorfigisimasaa atorfiit inuttalerneqarsimanngitsut ilagaat.

Mads Pedersenip meeqqanut, inuusuttunut ilinniartitaanermullu naalakkersuisutut atorfini decembarimi qimakkaa Naaja Nathanielsenip atorfini aamma maanna qimappaa, kiisalu nunanut allanut tunngasunut naalakkersuisup Vivian Motzfeldtip Siumup  naalakkersuisoqatigiinnit qaammammi matumani siusinnerusukkut aninerata kingorna atorfiata qanoq pineqarnissaa suli nalorninarpoq.

Vivian Motzfeldtimmi nunanut allanut tunngasunut naalakkersuisutut atorfia qanoq pineqassanersoq suli nalunaarutigineqanngilaq.

Aqqit nutaat piareersareerpigit toqqareerpisigilluunniit, qaqugulu saqqummiunneqassappat?

- Tassa naalakkersuisoqatigiinni tassani nalilersuineq sulinerlu soorunami ingerlapparput, uagullu aalajangiinerput aallaavigalugu inatsisartut katersuuppata taakku ivertinneqassapput, Jens-Frederik Nielsen pingasunngornermi unnukkut oqarpoq.

Atassut tunuarniarluni sioorasaarivoq

Atassutip siulittaasua Aqqalu C. Jerimiassen folketingimut qinersisoqareerpat naalakkersuisoqatigiinnermi siunissaq partiimi aatsaat  aalajangiiffigineqassasoq, Siumup naalakkersuisoqatigiinnit aninerata kingorna nalunaarpoq.

Jens-Frederik Nielsen, Atassummut tunngatillugu qanoq neriuuteqarpit?

- Siammasinnerpaaq anguniarlugu suleqatigiinnerup ingerlanneqarnissaa ullormit siullermiilli oqaatigaarput, tamassumalu attatiinnarneqarnissaa neriuutiginersaavara. Atassullu oqaloqatigiinnerit ingerlatiinnaavippagut, partiilli taakku pingasuulluta naalakkersuisoqatigiinnerput suleqatigiinnerpullu pitsaasoq ingerlatiinnassagipput neriuppunga isumalluarlungalu, Jens-Frederik Nielsen oqarpoq.

Naaja Nathanielsenip Folketingimi suleqataa Qarsoq Høegh-Dam 4.619-inik taaneqarluni qinersinermi taaguunneqarnerpaavoq.