Demokratit Kongressip immikkoortuini marluunni amerlanerussuteqartut

Demokraatit Senatimi Repræsentanternes Husimilu USA-mi marlunngornermi qinersisoqarpat amerlanerussuteqarluarnissartik qulakkeersinnaavaat.

Imaappoq, Republikanerit, præsident Donald Trumpip partiia, Kongressimi ilaasortaatitaqarunnaangajassapput.

Misissuisarfiup Decision Desk HQ-p, Danmarkimi nalunaaqutaq malillugu pingasunngornermi ullaaralaakkut,  qinersinermi paasissutissaagallartut tunngavigalugit Demokraatit Senatimi amerlanerussuteqalertussatut nalilerpai.

USA-mi tusagassiuutit arlallit - ilaatigut CNN aamma NBC News, aamma taama naliliipput.

Decision Desk HQ-p tusagassiuutillu arlallit paasissutissaagallartut tunngavigalugit, Demokraatit USA-mi inatsisartuni amerlanerussuteqalerumaartutut marlunngornerup unnuaani nalilerpaat.

CNN allappoq, Kongressip immikkoortuini marlunni aqutsineq, ukiuni 50-ini kingullerni qinersinermi ataatsimi marloriarluni taamaallaat nikinnikuuvoq. 

Senatimi arfinilinnik issiatitaqalersut

Demokratit Republikanerit issiatiaqarfigisakuini Senatimi arfinilinnik katillugit issiatitaqalerput.

Partii taamaalilluni issiatitaqarfimmi tassani, naalagaaffiit assortuuffiusartut Michigan Minnesotalu, tamakkiisumik suli naatsorsuiffiunngitsut, sinnerlugit issiatitaqalinngikkaluarpalluunniit amerlanerussuteqalerpoq, Reuters allappoq.

Demokraatit Senatimut qinersinermi ajugaarujussuarput, Republikanereqarfissuarni allaat ajugaallutik.

Assersuutigalugu Texasimi, demokraatip James Talaricop senatimi issiatitaqarfik Republikanerinit qangali issiatitaqarfiusartoq issiaffigisussanngorpaa.

Demokraatit Republikanerit ajugaaffigigamikkit, naalagaaffinni arfineq-pingasuni  Repræsentanternes Husimi amerlanerussuteqalissapput.

Nunap immikkoortuini Kentuckymi, New Jerseymi North Carolinamilu tamanna pivoq.

Demokraatit siuariartornerat guvernørinut qinersinerni, Kongressimut qinersinerup saniatigut naalagaaffinni arlalinni ingerlanneqartumi, aamma takuneqarsinnaavoq.  

Texasimi guvernøri Greg Abbott, demokratimit Gina Hinojosamit ajorsartinneqarpoq, aamma naalagaaffinni konservativeusuni Iowami Ohiomilu guvernørinngortut Demokraatineersuupput.

RITZAU