Danskit naalakkersuisui suli isumaqatiginninniartut: Kalaallit kissaataat aaku
Danskit naalakkersuisoqatigiilernissamut isumaqatiginninniarnerat suli ingerlavoq – Mette Frederiksenilu maanna naalakkersuisoqatigiiliorniartunngoqqilluni.
Nunanit avannarlernit qinikkat isumaqatiginninniarnissamut sisamanngornermi ualikkut aggersarneqarput.
Inuit Ataqatigiinneersoq, folketingimut ilaasortaq, Naaja H. Nathanielsen Nuummiit internetti aqqutigalugu ataatsimiigiarpoq, Naleqqameersorlu Qarsoq Høegh-Dam Marienborgimut isumaqatiginninniarfiusumut ornigulluni.
Taassuma ataatsimiilluarsimanertik nalunaarutigaa.
- Mettep (Frederiksen aaqq.) ministeriunertut toqqarnissaa toqqissisimaffigilluinnarparput, kisianni isumaqatiginninniarnerit soorunami suli ingerlapput, Qarsoq Høegh-Dam oqarpoq.
Naaja H. Nathaneislenip ammalluinnartumik pitsaasumillu oqaloqatigiissimallutik aamma oqaatigaa:
- Illugiissumik paasissutissiilluarfiuvoq, kisianni kissaatigisatsinnut tunngatillugu tamakkiisumik angusaqanngilagut, taanna oqarpoq.
Akisussaaffiit pisinnaatitaaffiillu
Naleqqap Danmarkip nunatsinni akisussaaffigisaanik kivitsisoqangaatsiarnissaa ullumikkut isumaqatiginninniarnermi piumasaqaatigaa.
- Qinigaaffimmi matumani naammaginartumik pitsaassuseqalissapput. Qinigaaffiup tullissaanut utaqqerusunngilagut.
Danmarkip nunatsinni oqartussaaffiit 30-t missaanniittut ullumikkut akisussaaffigai.
Naleqqap tamatuma saniatigut nunat inoqqaavisa pisinnaatitaaffii – tassunga kalaallit pisinnaatitaaffii ilanngullugit – kunngeqarfimmi tamarmi qulakkeerneqarnissaat piumasaqaatigaa.
Inuit Ataqatigiit allanngortinneqarsinnaanngitsumik piumasaqaateqarlutik isumaqatiginninniassanngitsut, Naaja H. Nathanielsenip oqaatigaa. Taakkuli ataatsimoortumik isiginninniarput.
- Kunngeqarfiup aaqqissuuteqqinneqarnissaanik eqqarsaateqarluta ersarissumik kissaateqarpugut, Naaja H. Nathanielsen oqarpoq, nangillunilu:
- Kisianni atugarissaarnermut, sinaakkutitut isumaqatigiissummut, aamma attaveqaasersuutinullu pingaaruteqartunut atatillugu aalajangersimalluinnartunik aamma piumasaqaateqarpugut.
Inatsit tunngaviusut allanngortinneqarnissaat kissaatigigaa
Naaja H. Nathanielsenip Folketingimut qineqqusaarnermini nunatta Savalimmiullu tamarmik marlunnik Folketingimut qinigaatitaqartarnerat allanngortikkusunnerarpaa.
Taassuma nunatsinnit oqariartuutigineqartut nukittunerulernissaat anguniarpaa, oqarneralu naapertorlugu taamaattoqarnissaanut inatsit tunngaviusuni aamma Namminersorneq pillugu inatsimmi allannguisoqarnissaa pisariaqarpoq.
Naaja H. Nathanielsenip taamaammat inatsit tunngaviusoq pillugu ataatsimiititaliarsualiortoqarnissaa ilaatigut kissaatigaa.
Qarsoq Høegh-Damilli piumasaqaat tamanna tapersinngilaa.
Inatsit tunngaviusut qanoq oqaasertaqarnerat soqutiginngilluinnarparput, taanna oqarpoq.
Taassumalu nunatta tunngaviusumik inatsisissatut siunnersuutaa oqallisigerusullugu ilanngullugu oqaatigaa.
Naalakkersuisoqatigiilersitsiniartup, Mette Frederiksenip Socialdemokraatit, Socialistisk Folkepartiit, Moderaatit aamma Radikale Venstre peqatigalugit aamma Enhedslistenimit Alternativeniillu inatsisartunit tunngaveqarlutik ikinnerussuteqarlutik naalakkersuisoqatigiiliornissaq maanna isumaqatiginninniutigaa.
Taama inissiisoqassappat danskit naalakkersuisui partiinik allanik suliamiit suliamut amerlanerussuteqarniartariaqartassapput.
Qarsoq Høegh-Dam taamaattoqassappat tamanna qanoq atorniarpiuk?
- Kalaallinut imaluunniit nunanut allanut politikkimut tunngassuteqanngippat nunami imminermut pisunut akuliuttarnianngilagut. Inatsisartunut tunngatillugu tarpersuisuuginnarsinnaavugut, taamaattoqassappalli piumasaqaateqassaagut, taanna oqarpoq.
Danmarkimi naalakkersuisoqatigiit qanorluunniit ittut pilersinneqaraluarpata Naaja Nathanielsenip danskit naalakkersuisuisa nunarput pingaarnerutinniassagaat naatsorsuutigaa.
- Danskit naalakkersuisuinit pissutsinik uagutsinnut tunngasunik nassuerutiginnittoqarnissaa pisariaqartippara. Aningaasaliisoqarnissaata pisariaqarnera, oqaluttuarisaanitsinni pisimasut nuanniitsut, suliallu erseqqissarneqanngitsuit, soorlu inatsisitigut ataataqanngitsunut, meeravissianngortinneqarsimasunut tunngasut aamma naartunaveersaasernermut suliami eqqugaasimasunut taarsiissuteqarnissamut tunngasut allallu isiginialissagaat, taanna oqarpoq.
