Pilersuisoq: Uummannami pisiniat Dankort atorlugu pisiniarsinnaapput

KNR-ip Nukissiorfimmi ikuallattoqarnerata kingunerisaanik innaallagiaarunnera peqqutaalluni Uummannami pisiniarsinnaanerup killeqarnera ippassaq nutaarsiassiissutigaa.

Tassani innuttaasup John Møllerip attavilunnera peqqutaalluni aningaasanik tigusisarfiit ajoquteqarneri oqaatigaa.

Pisiniarfinni aningaasat kisiisa atorlugit pisiniartoqarsinnaanera ajornartorsiutaasoq, John Møllerip oqaatigaa.

Tusassip ajornartoornermi pilersuutip oqarasuaatit angallattakkat attaveqaannarnissaannut napparummik ingerlatsisinnaasimanera ippassaq ullaakkut paasissutissiissutigaa.

Pilersuisoq

Uummannami Pilersuisup Facebookimi quppernermini attaveqaatit ajorneri innaallagiaqannginneralu ippassaq oqaatigaa. 

Ajornartorsiutilli ilaannut aaqqiissutissaqarallarnerarput.

Innuttaasut Visa/Dankorteqarunik dankortimut akiliissutit, internetsimut attaveqanngikkaluartut atorsinnaavaat.

Innuttaasulli Mastercard Debiteqartut imaluunniit Akiliuteqartut periarfissaq tamanna atorsinnaanngilaat.

Pisiniarfiup allaffia taamaammat ippassaq nal. 16.00-ip tungaanut ammatinneqarpoq, innuttaasullu aggorsimasunik tigusisinnaatinneqarlutik.

Ullumikkut pissutsit

KNI-mi sulisoqarnermut pisortap Juliane Henningsen Heilmannip Uummannami kortimik akiliinissamut piumasaqaatit ippassaq atuuttut ullumikkut suli allannguuteqannginnerat oqaatigaa.

Taakku nunaqarfinni allaffiit suleqatigalugit innuttaasut aningaasanik tigusinissaannik ullumikkut aamma ikiuipput.

- Pisiniarfik ippassaq ullaap tungaani innaallagiaqalerpoq. Pisiniarfissuaq ammatipparput, pisiniarfillu mikineq matoqqatillugu.

Juliane Henningsen Heilmannip Pilersuisup nioqqutissat qerisut ajortinnginniassammata aakkiartornissaat pinngitsoortissimasinnaagaat oqaluttuaraa.

- Ajornartorsiummit aniguisimanerput qujanarpoq, taanna oqaluttuarpoq.