Narsami aasaanerani sammisaqartitsineq siunissamut sunniuteqarluassasoq
Narsaq nunarsuarmit tamalaaneersunik nammineq kajumissutsiminnik suleqataajartortunik, Narsami innuttaasunik aamma meeqqanik inuusuttunillu neriuutigineqartutut nuannaartunik juulip qulingiluaannit 22-ata tungaanut ulikkaassaaq.
Narsami meeqqat inuusuttullu sammisanut assigiinngitsunut aasaanerani aatsaat sammisaqartitsisoqassaaq.
Suliniaqatigiiffik, Kalaallit Meerartaat tusagassiuutinut nalunaarummi allappoq.
- Meeqqat inuusuttullu nuannerluinnartumik aasarsiorluarnissaannut Narsarmiunillu suleqateqarnissarput qilanaareqaarput. Suliagut tamarmik meeqqat illoqarfimmilu innuttaasut qanimut suleqatigalugit ingerlanneqartarput. Namminneq kissaataat atorfissaqartitaallu taperserniartarpagut, allattoqarfimmi pisortaq Evi Kreutzmann, tusagassiuutinut nalunaarummi allappoq.
Piffissamut ungasinnerusumut suliniutaasoq
Aasaanerani sammisaqartitsineq Ikioqatigiinnermik taaguuserneqartoq ataavartumik suliniutigineqartussatut pilersaarutaavoq.
Suliniut najukkami innuttaasut meeqqanut ilaqutariinnullu suliniutinik nukittorsaanermut tapertaalluassaaq.
- Aasaanerani sammisaqartitsisarnerit ukiuni kingullerni sumiiffinni assigiinngitsuni innuttaasut suleqatigilluarumallugit ukkatarisimavagut. Aasaanerani sammisaqartitsinerit suleqatigiinnissamut aallaqqaasiutigissallugit tulluarput, piffissaq ungasinnerusoq eqqarsaatigalugu Narsarmiunut ataavartumik pitsaasumillu sunniuteqarluaqqullugit, Evi Kreutzmann oqarpoq.
- Narsami namminneq kajumissutsimik suliaqartarneq ukiorpassuarni ingerlalluartorujussuujuaannarnikuuvoq. Taamaakkaluartorli suli ataatsimoorfiusinnaasut amerlanerit atorfissaqartinneqarput.
Narsami aasaanerani sammisaqartitsinissap saniatigut Qeqertarsuarmi piffissami tassani aasaanerani aamma sammisaqartitsisoqassaaq, Kullorsuarmilu aasaanerani immikkut ittumik sammisaqartitsisoqassalluni, tassa nunaqarfimmi ilaqutariit illuat iluarsartuunneqarlunilu qalipanneqassaaq.
