Danmarkimut tikeraarneq pillugu isornartorsiuisoqareersoq: Jens-Frederik Nielsen maanna oqaaseqartoq
Naalakkersuisut siulittaasuata, Jens-Frederik Nielsenip (D) apriilip naanerani Danmarkimukarluni ministeriuneq Mette Frederiksen ataatsimeeqatigaa.
Taassuma Marienborgip saani tusagassiortunik katersortitsinermi ”bussimik qaninnerulernissamut” piffissanngortoq erseqqissaatigaa. Naalakkersuisut siulittaasuata oqaaseqarnerata kingorna namminersorneq pillugu inatsimmut atatillugu Danmarkimut isumaqatigiinniartoqaqqinnissaanik kissaateqarnerarsimanini pillugu aperineqarpoq.
Tamannalu naalakkersuisuusimasumit, Jess Svanemit (S) ilaatigut isornartorsiorneqarpoq. Taassumami matut matoqqasut tunuanni isumaqatigiinniartoqarnissaa tamat oqartussaaqataanerannik tunngaveqanngissoraa. Oqaloqatigiinnerli tamakkiisumik tamanut ammasuusariaqarsorlugu.
Jens-Frederik Nielsenip oqaaseqarnera taanna pillugu Jens NapãtôK’ (N) naalakkersuisunut §37-mut apeqquteqaateqarpoq, taassuma naalakkersuisoqatigiit sooq ataatsimuunnginnerat kiisalu Jens-Frederik Nielsenip aamma Mette Frederiksenip sunarpiaq oqaloqatigiissutigisimaneraat paaserusuppaa.
Naalakkersuisut akissuteqartut
Jens-Frederik Nielsen apersorneqarumanngilaq, isornartorsiuisoqarneralu toqqaannartumik oqaaseqarfiginagu.
Naalakkersuisulli nittartagaatigut tusagassiuutinut nalunaaruteqarneratigut namminersorneq pillugu inatsit Danmarkimut isumaqatigiinniutigineqanngitsoq naalakkersuisoqatigiilli isumaqatigiissutaata imarisaa saqqummiunneqaannartoq allappaa.
- Oqaloqatigiinnermi isumaqatigiinniarnernik ingerlatsisoqanngilaq erseqqissarneqarlunili Naalakkersuisunngortut isumaqatigiissutaani anguniarneqartut piffissami aggersumi naapeqatigiissutigineqartarnissaat naatsorsuutigineqassasoq, Jens-Frederik Nielsen oqarpoq.
Taassuma naalakkersuisoqatigiinnissamut isumaqatigiissummi allassimasoq tassa naalakkersuisut namminiilivinnissamut toraagaqarneq ingerlanneqartoq erseqqissaatigaa. Taamaammat taassuma oqaatigisai Danmarkimut pituttornerulernermik isumaqanngillat.
- Nunarsuarmi pissutsit tunngavigalugit Danmarki aammalu NATO suleqatigilluartussaavagut. Suleqatigiilluarneq isumaqanngilaq Danmarkimut pituttornerusoqalernissaanik, nunattami soqutigisaraa namminersulivinnissaq taamaattoq aamma soqutigisaralugu nunarsuarmiooqataalluni sillimaniarnissamut suleqataanissaq, Jens-Frederik Nielsen oqarpoq.
KNR-ip Siumup siulittaasua, Vivian Motzfeldt apersorniarsarigaluarpaa. Jess Svanep isornartorsiuinera Siumumit isumaqatigineqarnersoq Motzfeldtimut apeqqutiginiaraluarparput. Taannali apersorneqarusunngilaq.
