Jess Svanep Jens-Frederik Nielsen isornartorsioraa: Danmarkimut oqaloqatiginninneq ernumanarpoq
Naalakkersuisut siulittaasuata, Jens-Frederik Nielsenip (D) aamma danskit ministeriunerata, Mette Frederiksenip oqaaseqarnerat naalakkersuisuusimasup, Jess Svanep (S) tigulluanngilaa.
Siumumi ukiorpassuarni ilaasortap naalakkersuisut siulittaasuisa marluk namminersorneq pillugu inatsimmik nutaamik oqaluuserinnilernerat naammagisimaanngilaa. Taassuma tamanna “ernumanartoqartippaa”.
- Namminersorneq pillugu Inatsit nunat marluk akornanni isumaqatiginninniutissaanngilaq. Inatsit tassaavoq inuiaat Kalaallit piumasaanik ersersitsisoq taamaallaallu inuiaqatigiit Kalaallit pigisaat allanngortissinnaasaallu, Jess Svane tusagassiuutinut nalunaarummi oqarpoq.
Taanna Jens-Frederik Nielsenip naalakkersuisut siulittaasuattut siullermeertumik - Danmarkimut sapaatip akunnerata siuliani tikeraarnerata kingunerani taama oqaaseqarpoq.
Jens-Frederik Nielsenip Mette Frederiksenillu ‘iluminni pissutsit’ oqaluuserisimi ilaat sapaatip akunnerata siuliani sapaammi tusagassiortunik katersortitsinermi saqqummiuppaat.
Naalakkersuisummi namminersorneq pillugu inatsimmik nutaamik isumaqatigiinnialertoqarnissaa kissaatigaat. Tamannalu danskit ministeriunerata aamma piareersimaffigaa.
- Danmarkilu kalaallinut inuiaqatigiinnut aningaasaleerusussuseqarpoq, Mette Frederiksen Marienborgimi tusagassiortunik katersortitsinermi oqarpoq.
Danmarkimut atassuteqarnermut tapersiineq?
Kisianni ‘oqaluuserinninnerit’ taakku tamat oqartussaaqataanerannik tunngaveqanngitsut, Jess Svane isumaqarpoq.
- Inatsit taamak pingaaruteqartigisoq matut matoqqasut tunuanni allanut isumaqatiginniniutigineqarsinnaanngivippoq, aamma apeqqummi oqartussaaqataaneq ataqqinagu ingerlaniartoqalersinnaanngilaq, taanna tusagassiuutinut nalunaarummi oqarpoq.
Taassuma ministeriunerup Danmark kalaallinut inuiaqatigiinnut aningaasaliinissamut piareersimaneranik oqaaseqarnera maluginiarneruaa.
Tamanna nunarsuarmi politikikkut maannakkut pissutsit pissutaasorai.
Ammasuunissarli pisariaqartoq, Jess Svane isumaqarpoq. Taamaammat Jens-Frederik Nielsenip oqallisigineqartut Inatsisartunut nassuiaatigissagai kissaatigaa.
- Kalaallit Nunaata siunissaa namminiussuseqarneralu pillugit oqalunneq isumaqatiginninniarpalunnerlu taamaallaat ammasumik ingerlanneqarsinnaapput, aamma taamaallaat innuttaasut erseqqissumik tunuliaqutsiisimaneratigut.
- Nassuiarneqartariaqarpoq Danmarkimut atanerup nukittorsarneqarnissaanik oqariartorneq kikkunnik tunuliaqutaqarluni oqariartornerunersoq, Jess Svane allappoq.
KNR-ip isornartorsiuineq Jens-Frederik Nielsenimut saqqummiuppaa, ilanngutassialli saqqummersinnginnerani apersorneqarnissaa periarfissaanngilaq.
