Borgmesteri Amerikamiut uuliasiortut pisortaannut allakkamini: - Tatigineqarnissat naatsorsuutigisinnaanngilat

- Siullertut assigiinngitsunik oqariartuuteqarnerup nunatta avataanit maluginiarneqarnissaa neriuutigaara. 

- Innuttaasunut allatut oqartoqartoq Amerikamiunut allatut oqartoqartarpoq, tamanna maluginiarneqarnissaa neriuutigeqaara. 

Kommuneqarfik Sermersuumi borgmesteri Avaaraq Olsen (IA) amerikamiut uuliaatileqatigiiffianni Greenland Energy Companymi pisortaq Robert Price pillugu taama KNR-imut oqaaseqarpoq.

Videopodcasti Robert Pricep TV-mit ilisimaneqarluartullu Dr. Philip peqataaffigisaat ataasinngornermi saqqummerpoq, Robert Pricelu uissuumminartunik arlalinnik, KNR-ip misissorsimasaanik, tassani oqaaseqarpoq. 

Pisortamit oqariartuutigineqartut assigiinnginneri pissutigalugit borgmesteri Robert Pricemut tamanit atuarneqarsinnaasumik pingasunngornermi allagaqarpoq.

Allakkami Avaaraq Olsenip Robert Price Amerikamiunut kalaallinullu assigiinngitsunik oqaaseqarnera eqqartorpaa.

Pisortaq Ittoqqortoormiini innuttaasunik ataatsimiisitsinermi imminut uppererpasinnani toqqissisimannginnerusutut ippoq. Saqqummiinermini piviusut aallaavigivai tusagassiortulli apersulermata kingorna qimaalluni.

Robert Price Greenland Energy Companymi pisortaavoq, taamaalluni suliffeqarfiutini allat suleqatinilu aqqutigalugit Jameson Land Basinimi uuliasiornissaanut misissuisinnaatitaalluni. Assi © : Markus Valentin / KNR

Taanna KNR-imut danskillu tusagassiuutaannut arlaleriarluni oqaaseqarumanngivittarpoq. 

USA-mili akulikitsumik apersorneqartarpoq, imminullu tatigerpasittarluni. 

Muté B. Egedep, nunanut allanut, inuussutissarsiornermut aatsitassanullu naalakkersuisup eqqunngitsuuneragai apersorneqarnermini aamma oqaatigisarpai. 

Avaaraq Olsenillu suliamut tunngatillugu assigiinngitsunik saqqummiussisoqarnera aamma eqqumiigivaa.

- Imminut tatigalutit, uppernassuseqarlutit tulluusimaarlutillu oqalupputit. Inuilli sumiiffimmut misissuiffigerusutannut qaninnerpaallutik najugaqartut saanniileravit oqariartuutit allarluinnanngoriasaarpoq, borgmesteri allakkami allappoq. 

- Kikkunnut oqalunnerit apeqqutaatillugu oqariartuutit allanngortittarukku tatigineqarnissat naatsorsuutigisinnaanngilat.

Innuttaasut iluamik pineqassasut

Avaaraq Olsenip Ittoqqortoormiini innuttaasut isumakuluutaat, KNR-p siornatigut allaaserisaatut, tusareerpai. 

Arlallit Amerikamiut uuliasiortut pisortaannit innuttaasunut ataatsimiititsinerup kingorna unneqqariffigineqanngitsutut taassuminngalu tatigisinnaanngitsutut misigisimanerarput.

- Kikkut salloqittarpigit, Mr. Price? Kalaallit Nunaanni innuttaasut imaluunniit USA-mi isiginnaartutit? Borgmesteri allakkamini allappoq. 

Borgmesterip allakkat Ittoqqortoormiini innuttaasut eqqortumik pineqarnissaannut iluaqutaajumaarnerat neriuutigaa. KNR-imut taama oqarpoq.

- Innuttaasut kikkut suleqatigigaluarpatigik unneqqarissumik pineqarnissaannik piumasaqarnermut tunngavoq, Avaaraq Olsen oqarpoq.

- Innuttaasut salloqittarneqarnerlutik paaserusuppaat iluamillu pineqarsimanngitsutut misigisimapput. Taamaattumik eqqortumik oqaluttoqarnissaa paasissutissanillu eqqunngitsunik saqqummiussisoqannginnissaa erseqqissumik oqaatigaarput. 

Iliuuseqarnissamut periarfissat killeqartut

Avaaraq Olsenillu borgmesteritut suliami iliuuseqarsinnaanera killeqarpoq. Inuussutissarsiornermut aatsitassanullu naalakkersuisoqarfik Greenland Energy Companymut attaveqartuupput.

Taamaattorli borgmesterip suliaq qanimut malinnaaffiginiarlugu oqarpoq. 

- Kommuni oqartussatut akisussaasuunngikkaluartoq suliat eqqortumik ingerlanneqarnissaannut qinnuteqaatillu eqqortuunerannik qulakkeerinneqataanissarput pisussaaffigaarput.

- Kommunitut innuttaasutta illersorneqarnissaat akisussaaffigaarput. Suliarlu qanimut malinnaavigalugu peqataatinneqarnissarpullu piumasaralugu taamaaliorsinnaavugut.

Kommune Kujallermi borgmesteri januaarimi aamma allakkanik ammasunik allagaqarpoq. Allagaa Amerikamiut præsidentiannut Donald Trumpimut allagaavoq. Aatsitassarsiorneq innuttaasut ataqqillugit pinngippat unitsissallugu, tassani oqaluttuarpoq.   Assi © : Kommune Kujalleq

Suliami matumani qanoq iliuuseqarsinnaavit?

- Borgmesteritut iliuuseqarsinnaanera soorunami  killeqarpoq. Ittoqqortoormiinili Kommuneqarfik Sermersuumilu innuttaasut sinnerlugit oqalussinnaanera suliassanni pingaarnerpaavoq.

- Innuttaasut oqariartuutaat tusaaneqanngippata, tusaaneqanngitsutulluunniit misigisimappata, oqariartuutaannik erseqqarissaaqataasinnaavunga. 

Kujalleq Sermersoorlu sanilliullugit

Kommune Kujallermi borgmesteri, Malene Vahl Rasmussen (D) Donald Trumpimut ammasumik januaarimi allaqarpoq.

Præsidentip Donald Trumpip nunatsinnik tiguaanissamut sakkutuulersunnginnissamik itigartitserusunnginneranut atatillugu borgmesteri allagaqarpoq.

Taassuma aatsitassarsiornermi nunatsinni inatsisit tamakkiisumik malinneqanngippata aamma innuttaasut ataqqineqanngippata aatsitassarsiortoqannginnissaa allappaa.

- Peqqissaarneq, ataqqinninneq akisussaassuseqarnerlu atorneqanngippata Nunatsinni aatsitassanik siorannguamilluunniit annissisoqassanngilaq, borgmesteri Malene Vahl Rasmussen januaarimi allappoq.

Kujallermi borgmesterip Amerikamiunik suleqateqarnerup unitsinneqarnissaa oqaatigaa. Aamma illit taamaaliorusuppit?

- Kommuneqarfik Sermersuutut taakku (Amerikamiut aaqq.) suliami matumani suleqatigiissuteqarfiginngilagut. Uagutsinnut pissutsit Kommune Kujallermi pissutsinut sanillersuunneqarsinnaanngillat, Avaaraq Olsen oqarpoq.

- Pissutsini allaanerulluinnartuniillutalu allarluinnarmi ingerlatsinermiippugut.