Bankivik nunatsinni pisortassaminik toqqaasoq
Bankiviup Kalaallit Nunaanni pisortassani nutaaq toqqaqqammerpaa.
Anne Nivíka Grødem aggustip aallaqqaataani atorfinissaaq.
Bankivik tusagassiuutinut nalunaarummi taama allappoq.
Taassumap Visit Greenlandimi pisortaanertut tunuarniuteqarsimanera KNR-ip sapaatip-akunnerani kingullermi oqaluttuaraa.
- Anne Nivíka nunatsinni inuussutissarsiornerup tungaatigut ilisimasaqarluarpoq aqutsinerullu tungaatigut misilittagaqarluarluni. Pisinnaasai aningaaseriviup piujuartitsisumik ineriartortuarnissaanut iluaqutaassapput, najukkamilu attaveqarluarnerulersissallutik, Brian Smedemark Bankivimmi niuernermut pisortaq allappoq.
Atorfik qilanaarigaa
Jesper Hansen nunatsinni pisortatut tunuartoq, Sermitsiamit siorna oqaluttuarineqarpoq.
Nulianilu Danmarkimut uterniarlutik aalajangersimanertik atorfimmit tunuarnerminut peqqutaatippaa.
Anne Nivíka Grødemip suliffittaassani qilanaaralugu oqarpoq.
- Bankivimmiilernissara tulluusimaarutigaara
- Bankivimmi, inuiaqatigiinni piginnaasaqarluartumi akisussaassuseqartumillu atuisartutsinnik pisariaqartitanillu paasinnittumi, suleqataasinnaanera tulluusimaarutigeqaara, tusagassiuutinut nalunaarummi allappoq.
