Visit Greenlandip pisortaa, ukiuni sisamani pisortaareerluni tunuarniuteqartoq

Visit Greenlandip pisortaa, Anne Nivíka Grødem, allanik suliaqarnissani aalajangiuppaa pisortatullu maajip naanerani tunuassaaq.

Takornariaqarnermut tunngatillugu suliaqartut tusagassiuutinut nalunaarummi saqqummiunneqaqqammersumi taama allapput.

Anne Nivíka Grødem ukiuni tallimani suliffeqarfimmiippoq 2022-milu pisortatut atorfinitsinneqarluni. Atorfik Linda Kleistimut, Head of Destination, Development & Cruisemi ullumikkut atorfilimmut maanna ingerlateqqissavaa.   

Linda Kleist pisortaagallartutut piffissami ikaarsaariarfiusumi atorfeqalissaaq.

- Siulersuisut siunissaq ungasinnerusoq eqqarsaatigalugu, Visit Greenlandip, ingerlalluarnissaa kissaatigaat. Taamaattumik siulersuisut pisortassamik nutaamik piaarnerpaamik atorfinitsitsiniarlutik suliniuteqassapput, aqutsineq patajaatsoq ataavartorlu qulakkeerniarlugu, suliffeqarfik allappoq.

Marluullutik qutsavissaasut 

Tamanna pillugu siulersuisuni siulittaasup, Anette Lingsip, pisortaajunnaalersoq, Anne Nivíka Grødem, pisortanngortussarlu, Linda Kleist, qutsavigai.

- Anne Nivíka nunatsinni ataatsimoortitsinikkut siuttuunermini, nunatta kinaassusaanut  nukittorsaaqataanikuuvoq aamma ataatsimoorluta aqqutissatsinnik ersarisumik pilersitseqataalluni. Anne Nivíka ataatsimoortitsinermigut allanngoriartornerujussuarmi maligassiuilluni, suliffeqarfimmilu ataqatigiissaarilluni toqqammaviusumillu ingerlatsinermi kivitseqataalluni, tusagassiuutinut nalunaarummi allaqqavoq. 

Linda Kleistillu pisortanngornissaa siulersuisut qujamasuutigaat. 

- Linda Visit Greenlandimi ukiuni pingasuni atorfeqareerpoq, takornariaqarnerullu iluani aqutsisutullu ilinniagaqarluni. Sumiiffinni takornariaqarfiusuni ineriartortitsinermi aqutsisutut siornatigut aamma suliaqarpoq. Suliffeqarfiup suliassaqarfii suliallu aallartisarneqareersut, pisortassamik nassartoqarnissaata tungaanut, siuariartornissaata qulakkeerneqarnissaat pisortaagallarnermini suliniutigissavai, tusagassiuutinut nalunaarummi allaqqavoq. 

Visit Greenland pisortamik nutaamik qaqugu ilisarititsissanerlutik  allaaserinngilaat.