Aningaasaataarunneq: Assammik arsarnermi arnat VM-mut anngunniuteqataassanngillat
Arnat assammik arsarnermi VM-mi naggataarnersiornerat Tysklandimi Hollandimilu pisussaq kalaallinit peqataaffigineqassanngilaq.
Taama inissittoqarpoq timersoqatigiit assammik arsartartut kattuffiat TAAK aningaasaqarniarneq pissutigalugu tunniutiinnarmat nalunaarluni arnat VM-mut anngunniunnissaanni kalaallit peqataassanngitsut.
Kattuffiup aaqqissuussaani nunani tamalaani peqataanerit akisummata siulersuisut mamaagisaminnik aalajangiussisariaqalersimapput.
- Aningaasaqarniarneq sinaakkutillu taamaatsillugit akisussaassuseqartumik aningaasaqarniarnermik aqutsiniarpugut taamaattumillu aalajangiullugu arnat maanna peqataanngikkallassasut, TAAK-mi siulittaasoq Carsten Olsen KNR-mut oqarpoq.
Peqqissiminerlu siulliussanani
Nuannaterujussuarnerup tamanna illuatungeraa 2023-mi aasakkut Nuummi Inussivimmi pisumi VM-mut anngunniunnermi tamakkerlun malinnaasoq kalaallit anngummata. Aamma taamatut pisoqarpoq ukioq taanna VM-ip naggataarnerani peqataammata.
VM-ip nalaani arnat inuusuttuaqqat VM-mut anngunniupput. Taakku aamma anngupput.
2024-mi nunat tamalaat unamminerini peqataanerit ingerlaqqipput angutit VM-mut anngunniullutik aammalu arnat inuusuttuaqqat Kinami VM-qataallutik.
Piffissarlu utertissinnaasuugaanni…
- Piffissaq taamanikkumut utertitsissinnaasuugaanni angutit peqataatinngiinnarsimasinnaagaluarpagut, kisianni taamani aamma naammagittaalliortoqarsimassagaluaqaaq. Siusinnerusukkulli aamma aalajangersimasinnaagaluarpugut allat peqataatinngiinnarallassallugit, Carsten Olsen oqarpoq.
Oqaluttuarisaanermut kingumut qiviaraanni angutit arnallu ataatsikkut nunanut allanut unammisartoqarniarnerat iluatsinngitsoortarpoq. 2001-mi arnat angutillu VM-mi peqataapput. VMip kinguninngua arnat nunanut allanut unammisartui unitsinneqarput.
Nunanut allanut unammisartut siunissaat
TAAK-mi aningaasaqarniarneq makittarissiteqqaarlugu nunani tamalaani peqataanerit aallarteqqinneqarsinnaapput.
Siunissamullu Carsten Olsen kissaateqarpoq arnat nunanut allanut unammisartui ingerlaqqissasut.
- Angutit assigalugit iligiit aallulluarneqassapput. Sungiusaqatigiikulanerussapput. Suliniarneq aamma ilusilersorluagaanerussaaq tamannalu aallartisalereerparput, Carsten Olsen oqarpoq.
Taanna aamma oqarpoq TAAK-miit Islandimiut aamma Savalimmiormiut assammik arsartartut kattuffii qanimut suleqatigineqalissasut VM-ip saniatigut pisut arlaqarnerussammata.
Carsten Olsenip oqaloqatigineqarnera tamakkiisumik tusaaneqarsinnaavoq KNR radio-mi radiomi timersornermi ataasinngornermi nalunaaqutaq 16.30-miit 18.00-mut aallakaatinneqartussami.
