Aningaasat tigummiat atorlugit orsertarfinni akiliisoqarsinnaajunnaassasoq

Biilit benziinamik dieselimilluunniit orsernissaannut akiliiniarnermi aningaasanik tigummianik hundredelinnik kaasarfimmit ammussinissaq siunissami pisariaqarunnaassaaq.

Orsertarfinni kortimik akiliummik nunani tamalaani atorsinnaasumik, soorlu Visamik Mastercardimilluunniit, 2027-mi januaarip arfineq-aappaaniit taamaallaat akiliisoqarsinnaalissaaq.

KNI tusagassiuutinut nalunaarummi taama allappoq.

- Digitalimik akiliissutit atuisunut sullissinermik sukkanerusumik pisariinnerusumillu pilersitsisarput, suliffeqarfimmilu aningaasanik uninngasuuteqartarnermut annikillisaaqataasarluni. Tamanna ingerlatsinermi isumannaatsuutitsinermut nalinginnaasumillu isumannaallisaanermut qaffassaataavoq.

- Digitalimik akiliiniarnermut aaqqiissuteqarneq atuisartunut sukkanerusumik pisariunnginnerusumillu sullissineruvoq tamannalu ilutigalugu aningaasanik tigummianik passussineq malunnaatilimmik annikillissaaq, KNI tusagassiuutinut nalunaarummi allappoq:

- Taamaaliorneq ingerlatsinerup isumannaatsuunissaanik isumannaassusermillu nalinginnaasumik pitsaanerulersitsissaaq.  

Korti akiliut maannangaaq saqqummeruk

Kortili akiliut atorlugu akiliineq ukioq nutaaq aallartitsinnagu pisariaqarsinnaavoq.

Aningaasanik tigummianik akiliiffissat pioreersut ajortinnikulluunniit maannangaaq taarserneqarnissaat pilersaarutaanngitsoq, KNI-p ilisimatitsissutigaa.

- Orsertarfinni nammineq akiliisarfiit teknikkikkut ajutoornerisa nutaanngilinerisaluunniit kingunerisaanik aningaasanik tigummianik akiliiffigineqarsinnaajunnaarpata, kortinik nunani tamalaani akiliissutaasinnaasunik taamaallaat akiliisoqarsinnaassaaq, tusagassiuutinut nalunaarummi allassimavoq.

Taamaattumik KNI-p innuttaasut aningaasanik tigummiaminnik akiliisartut piffissaagallartillugu allatut akiliisalernissaannik kajumissaarpai. Akiliut atorlugu akiliinissaq aamma periarfissaanngilaq.

KNI-p ukioq kingullermut naatsorsuutai 75 million koruuninik amigartooruteqarfiupput, pilersuisulli ikummatissalerinermut immikkoortortaa 16 millionit koruuninik sinneqartooruteqarpoq.