Folketingip Kangerluup nerukinneranut Hormuzimut sakkutooqarnikkut tapersiinissaq akuersissutigigaa

Folketingip, Kangerluup nerukinneranut Hormuzimut februaarilli naanerani USA Israelilu Iranimut sorsullutik aallartimmata matoqqasimasumut, Danmarki sakkutuunik nassiussissasoq aalajangerpaa. 

Tamanna Folketingip ataatsimiittarfissuani aalajangiiffigisassatut siunnersuut sisamanngornermi taasissutigineqareermat ersarippoq.

Sakkutuut nunanit tamalaaneersut Europamiunit aqutsisulerlutik Kangerluup nerukinnerani Hormuzimi suliaqartitaanerannut EU-llu sakkutuuisa imarsiortut suliaqarnerannut tapersiineq pineqarpoq. nunat assigiinngitsut peqataaffigisaannik sakkutooqarnikkut siunertarineqartoq  Tamanna imaani isumannaallisaanermik nukittorsaataassaaq aamma Hormuzstrædep aamma Det Røde Havip nalaani angalasoqarsinnaalersissavaa.

- Stabsofficereqarnermut tapersiineq, droneqarnikkut pisinnaasat oqalutsillu katillugit qulit missaanniittut pineqarput.

-  Taakkua saniatigut digitalikkut pisinnaasat danskit sakkutuuisa suliaannut ilanngunneqarnissaat aalajangiiffigisassatut siunnersuummi paasinarsivoq.

Aalajangiiffigisassatut siunnersuut marlunngornermi siullermeerneqarpoq piaartumillu suliarineqarluni.

Sakkutuunik aallartitsisut

Folketingimi partiit akornanni Dansk Folkeparti, Enhedslisten Borgernes Partiilu aalajangiiffigisassatut siunnersuummut taamaallaat akerliupput. Assiganik attaviitsut Cecilie Liv Hansen og Nadja Natalie Isaksen taamaaliorput.

Nunat arlallit, ilaatigut Frankrig, Kangerluup nerukinneranut Hormuzimut sakkutuunik aallartitsereerput taamaammat Danmark aamma tapersiissasoq nunanut allanut ministeri Lars Løkke Rasmussen (M) oqarpoq.

Sapaatip akunnerata siuliani Kangiani sorsunnerup naammassineqarnissaanut USA Iranilu tunngavissanik isumaqatigiissumik atsioqatigiipput.

Immikkoortulli arlallit aalajangiiffigineqanngillat ullullu 60-it ingerlaneranni eqqisseqatigiinnissamut isumaqatigiissummik sivisunerusumik atuuttussamik illuatungeriit pilersaarusiorput.

Taamaattumik USA Iranillu akornanni ”teknikkikkut isumaqatigiinniarnerit” Scweizimi juunip 29-anni 30-anniluunniit ingerlanneqarnissaat pilersaarutigineqarpoq.

USA-p Iranillu akornanni isumaqatiginninniarnerit kingulliit kingorna paasineqarpoq, aallartitat ullut 60-it ingerlaneranni eqqissinissaq anguniarlugu isumaqatigiissuteqarsimasut.

Isumaqatigiinniarnerit Bürgenstockimi hotellit luksusit immikkoortuanni ingerlanneqarput, tassani Qatar Pakistanilu isumaqatigiissitsiniartutut peqataapput.

/ritzau/