Royal Greenlandimi immikkut ittumik tallimanngorpat ataatsimeersuassasut

Royal Greenlandimi immikkut ittumik tallimanngorpat ataatsimeersuartoqassaaq.

Naalakkersuisut nittartakkaminni taama paasissutissiipput.

Ingerlatseqatigiiffik Namminersorlutik Oqartussanit pigineqartoq ilungersorfioreersoq taamaattoqarpoq.

Royal Greenland siorna akileraannginnermi 196 millionit koruuninik amigartoorpoq, 2023-milu akileraannginnermi 255 millionit koruuninik amigartoorluni. 

Ingerlatseqatigiiffiup aqutsisuini aamma allanngortoqarpoq. Ilaatigut pisortamik Susanne Arfelt Rajamandimik suleqatigiinneq februarimi taamaatinneqarpoq. 

Taassuma aamma najugaqarfia naalakkersuisut Royal Greenlandillu siulersuisuisa akornanni isumaqatigiinngissutaareerpoq.

Royal Greenlandip pisortaqatigiivisa nunatsinniinnissaat naalakkersuisunut taamani siulittaasup, Múte B. Egedep, ingerlatseqatigiiffiup 2023-mi ataatsimeersuarnermi piumasaraa.

Tamannali Royal Greenlandip siulersuisuini siulittaasup Maliina Abelsenip isumaqatiginngilaa.

- Aqutsisut tamarmik nunatsinniilernavianngitsut nalunanngilaq, Maliina Abelsen taamani oqarpoq.

Aqutsisut tamaaniinnissaannut 2024-mi ataatsimeersuarnermi piumasaqaatigineqaqqittoq, aviisi Sermitsiaq allappoq. Pisortaqatigiinnili sisamaasuni pingasut nunani allani taamani najugaqarput.

Naalakkersuisuni isumaqataanngitsoqartoq

Royal Greenlandimilu immikkut ittumik ataatsimeersuartoqarnissaa naalakkersuisuni amerlanerussuteqartut maanna aalajangerput. 

"Siulersuisuni ilaasortassatut siunnersuutigineqartoq akuerineqassasoq" naalakkersuisuni amerlanerussuteqartut aalajangertut, ataatsimiinnermit imaqarniliami allaqqavoq.

Amerlanerussuteqartumillu allaqqanera pissuteqarpoq. Naalakkersuisunummi ilaasortani isumaqataanngitsoqarpoq. 

- Naaja H. Nathanielsenip inassutigineqartut akuersaarsinnaanngilai, imaqarniliami allaqqavoq.

Ataatsimeersuarneq innuttaasunit qarasaasiakkut tallimanngorpat nalunaaqutaq 13:00-imiit uani malinnaaffigineqarsinnaassaaq.