Jens-Frederik Nielsen: Akuerineqarsinnaanngilaq Greenland Airportsimilu allanngortoqassaaq

- Pissutsit akuerisinnaanngilagut. Kukkuluttornerit sivitsortumik ingerlanerini inuiaqatigiinnut akisoorujussuarmik inissipput. Mittarfiup pitsaasumik kinguneqartussap aallartinnerani ajoraluartumik arriippallaartumik assakaasunik aallartitsisinnaalerpoq. Taannalu akuerisinnaanngilarput, Jens-Frederik Nielsen oqarpoq.

Ilaatigut nunanut allanut timmisartortussat isumannaallisaanermi Nuummi misissuiffigineqarsinnaajunnaarallaraluarnerat assersuutigaa. Nunanut allanut angalasussat Nuummi ullumi misissuiffigineqaqqilersinnaasut, Greenland Airports ippassaq nalunaarpoq. 

Ilungersunartulli amerlanerummata, naalakkersuisut allannguiniartut siulittaasuat oqarpoq.

- Naalakkersuisut immikkut ittumik ataatsimeersuartitsinissamik suliaqarpugut, tassanilu aamma siulersuisut nukittorsarneqarnissaanik siunertaqarluta suliaqassaagut. Iliuuseqartoqartariaqarmat, pissutsillu sivisuallaamik imaannikuummata.

Ilikkagaqarfigineqartariaqartoq

Naalakkersuisut Greenland Airportsimi siulersuisunik, ulluinnarni ingerlatsisunik atorfinitsitsisartunik, allannguisinnaapput. Siulersuisuni arfiniliusuni sisamat naalakkerusisunit toqqagaapput. Taakkunanili qanoq allanngortigisoqassanersoq, Jens-Frederik Nielsenip maanna oqaatigereerusunngilaa.

- Maannakkut eqqartussanngilara kikkut, suna, sumi allanngortoqassanersoq. Allanngortoqassasorli oqaannarsinnaavunga.

Aamma Greenland Airportsimi immikkut ittumik qaqugoqqissaaq ataatsimeersuartoqassanersoq maanna oqaatigisinnaanagu oqarpoq. 

- Kisianni neriuutigivissorpara sapaatip akunnerata tulliani aggersaassummik saqqummiussisinnaassasugut.

Nuummi mittarfissuup siorna novemberimi atulersup unammillernartoqarfiusarnera Nuummi mittarfimmuinnaanngitsoq ernumanartoq, Jens-Frederik Nielsen isumaqarpoq. 

- Aamma ilikkagaqarfigisariaqarpagut. Mittarfiit aamma marluk allat ammartussaavagut. Taamaammat pikkorinnerusariaqarpugut. Naalakkersuisuni taanna isumarilluinnarparput, mittarfiullu innuttaasuninngaanniit isigineqarnera soorunami kigarneqartoq paasisinnaallugu, Jens-Frederik Nielsen oqarpoq.