Aalborgip kalaallit suliffissaaleqisut amerlanerusut suliffeqalernissaannut ikiorniarlugit 1,5 million koruunit pissarsiarigai
Aalborgip Kommunia Suliffeqarnermut Naalakkersuisoqarfimmiit 1,5 millionit koruuninik pissarsivoq. Taakkulu kalaallit suliffissaaleqisut amerlanerusut suliffeqalernissaat siunertaralugu tunniunneqarput.
Kommuni naalagaaffiup aningaasaliissutaasa 3,6 millionit koruunit amerlanerpaartaat pissarsiarissavaa. Saniatigut taakku aningaasat Hjørringimi Viborg Kommunimilu suliniutinut aamma atorneqassapput.
Aningaasat inuit ataasiakkaat suliffissarsiornerannut, nalaassimasat pillugit katsorsaanissanut, oqaatsinik ilinniarnermut najukkamilu suliffeqarfiit suleqatiginerulernissaannut ilaatigut atorneqassapput.
Innuttaasut 100-t missaanniittut suliniummut 2028-mi aasap tungaanut ingerlanneqartussamut peqataanissaat naatsorsuutigineqarpoq.
Kalaallit Danmarkimi innuttaasut amerlanerpaat Aalborgimiipput, kommuni tusagassiuutinut nalunaarummi allappoq. Amerlasuut suliffeqarlutillu inuiaqatigiinni akuugaluartut, kalaallit atugarliortut kommunimut suli nuuttarnerat Aalborg Kommunimit maluginiarneqarpoq.
Aalborgip Kommuniani kalaallit inersimasut affaat sinnerlugit ikiorsiissutinik pisartagaqarput. Kommunilu naapertorlugu amerlasuut kommunip unnuisarfiiniittarput isumaginninnikkullu najugaqarfinniittarlutik.
Innuttaasunut 100-nut qanimut suliniuteqarneq
Aalborgip Kommuniani Suliffeqarnermut Isumaginninnermullu akisussaasup Peter Larsenip (SF) naalagaaffiup aningaasaliissutai nuannaarutigai.
- Kalaallit Nunaannut qangali attuumassuteqarnerput tulluusimaarutigaarput. Kalaallit Danmarkimi najugaqartut allatuulli periarfissaqartikkusuppagut. Amerlasuulli suliffeqarniarnermikkut arlaatigut ajornartorsiuteqarnerat nassuerutigisariaqarparput. Suliffeqarneq inuiaqatigiinnut akuulernissamut periarfissaalluarnerpaasarpoq, tamattali immikkut iliuuseqartariaqarpugut, Peter Larsen taama oqarpoq.
Suliniut Aalborg Kommunip, Aalborgimi Kalaallit Illuutaata Erhverv Norddanmarkillu qanimut suleqatigiissutigivaat.
Aaja Chemnitzip aningaasaliissutigineqartoq nuannaarutigaa
Folketingimi ilaasortaasimasup Aaja Chemnitzip (IA) aningaasat suliniutinut aalajangersimasunut atorniarneqarnerat nuannaarutigaa. Aningaasaliineq politikkikkut qangali suliniuteqarsimanerup kingunerigaa facebookkimini allaaseraa.
- Folketingimi ilaasortaaninni suliniutigisimasama kinguneqarluarnerat nuannaarutigaara. Eqqorluartumimmi pisoqarpoq, taama allappoq.
Ilisimatitsissutigalugulu Peter Larsenilu siornatigut tunngavilersuuteqartarsimallutik aningaasanik amerlanerusunik suliffissarsiortut pillugit aningaasaliisoqartariaqartoq. Aalborg Kommuniata isumassarsiornermik suliffeqarfimmik suleqateqarsimanera aamma qutsavigaa, immikkut anguniaqarluni suliaqarsimammat.
- Isumassarsiornermik suliffeqarfiup Aalborgip Kommunianik suleqateqarsimaneranut qujavunga, tamatta anguniakkatsinnut, Aaja taama allappoq.
Ministeri: Amerlanerit sulilerpata tamatsinnut iluaqutaassaaq
Suliffeqarnermut ministeri Ane Halsboe-Jørgensenip (S) oqarnera naapertorlugu aningaasaliissutigineqartut kalaallit suliffeqanngitsut sulilernissaannut iluaqutaassaapput.
- Amerlanerusut ilinniagaqalerlutillu sulilissagaluarpata tamatsinnut pitsaanerussaaq. Inunnut ataasiakkaanut inuiaqatigiillu aningaasaqarnerannut pitsaassaaq, ministeri taama oqarpoq.
VIVE-p misissuisimanerata takutippaa Danmarkimi kalaallit inersimasut suliffimminnut qallunaannut sanilliullugit paarsinnginnerusartut, misissueqqissaarnerup takutillugu.
Suliniutigineqarsimasuniit misilittakkat aallaavigalugit ataasiakkaat qanimut suleqatigalugit pisinnaasaat naapertorlugit ingerlatsineq pitsaanerpaamik inerneqartartoq paasineqarpoq.
Sivisuumik atuuttussanik aningaasaliisoqarnissaa pisariaqartinneqartoq
Peter Larsenip Aalborgip Kommunianiit aningaasaliineq suliniutigineqartumut akuerinninnertut isigaa.
- Suliffeqarnermut ministereqarfimmiit aningaasaliineq suliniutitsinnik akuerinninnertut isigaara. Taamaattumik sivisunerusumik suliniuteqarsinnaanitsinnut ataavartunillu kinguneqartitsinissatsinnut siunissaq ungasinnerusoq eqqarsaatigalugu aningaasaqarnikkut tunngavigisat qanoq qulakkeersinnaanerinut tunngatillugu suliffeqarnermut ministerip oqaloqatiginissaa qilanaaraara, taama oqarpoq.
