Nunanit allanit sunnerneqarneq Aasiannilu tunisassiorfik: Naalakkersuisut pisassiissutinik neqerooruteqartitsisimanertik atorunnaarsikkaat

Inuit ikittunnguit inuiaqatigiinni nalilinnik aqutsisut, aalisarnerup tungaatigut nunani allani sunniutillit Aasianni suliffinnik annaassinissamut pilersaaruteqanngillat.

Ajornartorsiutit tamakku naalakkersuisut qaleralinnik, saarullinnik nataarnanillu pisassiissutinik neqerooruteqartitsinerminnik unitsitsigallarnerannut pissutaapput.

Aalisarnermut, Piniarnermut, Nunalerinermut Imminullu Pilersornermut  Naalakkersuisoqarfik tusagassiuutinut taama nalunaaruteqarpoq.

Taamaattumik naalakkersuisoqarfik piginnittut siammasinnerusumik agguataarneqarnissaat Aasiannilu suliffissaqartitsineq siuarsarniarlugu marlunnik maanna neqerooruteqartitsivoq.

- Aasianni 2026-mi ukiunilu qulini pisassiissutinik piginneqataaffiusumi suliffissat sapinngisamik amerlanerpaat qulakkeerniarneqassasut, neqeroortitsinerit aappaanni allassimavoq.  

Nunanit allaneersunik piginnittoqaqqusaanngitsoq

Aalisarneq pillugu inatsimmi nutaami 2024-meersumi aalisarnerup amerlanerusunut siammarterneqarnissaa pingaartinneqartut ilagaat. 

Naalakkersuisulli tamanna pisassiissutinik neqerooruteqartitsinerminni iluatsinnginnera nassuerutigaat. 

- Qinnuteqartut amerlanerpaartaasa neqeroortitsinermi siunertarineqartoq, tassa piginnittuunerup siammasinnerusumik agguataarneqarnissaannik qulakkeerinninnissaq, naammassisimanngilaat, naalakkersuisoqarfik allappoq nangillunilu:

- Ingerlatseqatigiiffiit qinnuteqartut amerlanerit ikittuinnarnik piginnittoqarput tamannalu inuit ikittuinnaat inuiaqatigiit pigisaannik pigisaqalernerannik kinguneqarsinnaavoq.

Aammattaaq qinnuteqartut amerlanerit nunanit allaneersunit aningaasaliiffigitinniarlutik pilersaaruteqarnerat neqeroortitsinermi taamaatiinnarneqartumi erseqqissarneqarpoq. Ingerlatseqatigiiffiilli kalaallit aalisariutaannik pioreersunik atorneqanngitsunik atuisussaassapput:

- Nunanit allaneersut pigisaannik atuineq nunat allaneersut sunniuteqarnerannik annertusaaqataasinnaavoq, tamannalu aalisarneq pillugu inatsimmi tunngaviusumik aalajangersakkanut naapertuutinngilaq, naalakkersuisoqarfik allappoq. 

Taamaattumik ingerlatseqatigiiffiup kalaallinit tamakkiisumik piginnittoqarnissaa neqeroortitsinermi nutaami piumasaqaataavoq aamma angallatinik nunanit allaneersunit piginnittulinnik atuinissaq inerteqqutaavoq.

Aasianni tunisassiorfik qulakkeerneqassasoq

Polar Seafoodip Aasianni tunisassiorfiup raajartassiissutit ikiliartornerat pissutigalugu siunissami ammatiinnarneqarsinnaannginnera, siusinnerusukkut oqaluttuaraa.

Taamaattumik suliffeqarfiup tunisassiorfik matuneqassanngippat qaleralinnik pisassiissutit amerlanerpaartaannik pisassaqarnissaq  kissaatigalugu Sermitsiamut oqaluttuaraa.

Naalakkersuisullu taama piumasaattut iliorusussinnaarpasipput.

Neqeroorusiortitsinerillu aappaanni, Aasianni suliffissanik qulakkeerinninnissamik piumasaqaatip avataatigut, pisassiissutigineqartut  ikinnerpaamik 25 procentiisa Aasianni tulaanneqartarnissaat pingaartinneqarpoq.

- Qinnuteqaatinik naliliinermi Aasianni sulisorineqarsinnaasut qanoq amerlatigineri suliffissaqartitsiniarnerullu qanoq qulakkeerneqarnissaanut pilersaarut immikkut pingaartinneqassapput.Pisassiissutissanik agguaassinermi Aasianni suliffissaqartitsiuarnissap qulakkeerneqarnissaa aalajangiisuussaaq.

Kitaani qaleralittassat neqeroortitsinermi matumani katillugit 2.468,5 tonsiupput Tunumilu saarullittassiissutit 5.000 tonsiullutik.

Neqeroortitsinerup aappaanni Kitaani qaleralittassat 2.468,5 tonsiupput, saarullittassiissutit 1.950 tonsiupput qaleralittassiissutillu 166,6 tonsiullutik. Neqeroortitsineq tamanna aalisartunut pisassiissutinik pigisaqariinngitsunut neqeroortitsineruvoq.

Pisassiissutinik neqeroortitsinermi kingusinnerpaamik juulip 24-anni qinnuteqartoqassaaq.