Tarnimikkut nappaatillit aqqusiniinnarmut innersuutissallugit siunertaqanngilaq
- Tarnimikkut nappaatillit pisortat inissiaataanni najugaqannginnissaannik oqaannarnikkut ajornartorsiutit aaqqissinnaanngilagut, Naaja Nathanielsen KNR-imut oqarpoq.
IA sinnerlugu Intsisartunut ilaasortap Sivert K. Heilmannip tarnimikkut nappaatillit Namminersorlutik Oqartussat inissiaataanni inissaqannginnerinik aalajangiisimaneranut tunngatillugu inunnut isiginnittaaseq "avaanngunartutut" isiginerarpaa piaarnerpaamillu nassuiaasoqarnissaanik piumasaqaateqarluni.
AAMMA ATUARUK Heilmannip aalajangiusimaannarpaa: Tarnimikkut nappaatillit inissianiitinneqassanngillat
Tamanna tunngavigalugu § 37 naapertorlugu Naalakkersuisunut apeqquteqaateqarpoq. Naalakkersuisunullu apeqqutigaa, tarnimikkut nappaatillit Namminersorlutik Oqartussat inissiaataannit mattussaanerat inuttut pisinnaatitaaffinnut naapertuunnasorineraat.
- Innuttaasunik taamatut immikkoortitsiniartoqarnera kukkunerulluinnartutut isumaqarfigaara.
- Innuttaasunik ilungersoreeqisunik sanngiillisitseqqinnertut isigaara, Naaja Nathanielsen oqarpoq.
AAMMA ATUARUK Aaja Chemnitz Larsen: Namminersorlutik Oqartussat akisussaaffitsik qimarratigaat
Naalakkersuisunut aamma apeqqutigaa, inissianut namminersorlutik oqartussanit pigineqartunut mattussineq inuiaqatigiinni eqimattakkuutaanut allanut siunissami aamma atuuttunngortinneqassanersoq kiisalu taamatut aalajangiisoqarneranut assortuussutaasumut suna toqqammavigineqarnersoq.
Naalakkersuisoq Sivert K. Heilmann, Atassut, ullumi tallimanngornermi ullaap tungaani tusagassiorfinnut allagaqarluni isornartorsiorneqarnini akissuteqarfigaa, oqarluni namminersorlutik oqartussanit allatut iliorsinnaanngitsut, taamaaliornermigullu allakkani passortuussutaasuni oqariartuutigineqartoq aalajangiusimaannarpaa.
AAMMA ATUARUK Ineqarnermut naalakkersuisoqarfiup allagai borgmesterip tupaallaatigai
Inissiaq inissiarsuup naqqaniittoq tarnimigut nappaatilimmut atorneqassagaluarpat, kommunip inissianut inissiarsuit naqqaniittunut innersuussisinnaanini annaassavaa. Aamma tarnimigut nappaatillip eqqaamiunut akornusersuutaannginnissaanik imaluunniit avatangiisiminut ulorianartorsiortitsinnginnissaanik kommuni naliliisimagaluarpalluunniit tamanna atuutsinneqassaaq.
- Tamannalu inuttut pisinnaatitaaffinnik unioqqutitsinertut nalilerpara, aamma Kommuneqarfik Sermersuup Inuttut pisinnaatitaaffiit pillugit Danmarkimi Misissuisoqarfimmut naliliisitsisimavoq paasivara, tassangaanniillu taamatttoqarneranik naliliisoqarpoq. Pisortani oqartussaasut taama immikkoortitseqqusaanngillat, Naaja Nathanielsen oqarpoq.
AAMMA ATUARUK Ineqarnermut naalakkersuisoqarfiup inuttut pisinnaatitaaffiit unioqqutippai
Taassuma aamma erseqissaatigaa, tarnimikkut nappaatillit ajornartorsiutigineqarsimappata tamanna allatigut aaqqiissuteqarfiginissaanut periarfissarpassuaqarpoq, siullerlu tassaasoq pisortanit pitsaasumik pineqarnissaat.
- Oqaloqatigiissutigineqartariaqarpoq, ajornartorsiuteqarneranillu isumaqaraanni innuttaasunut immikkut pisariaqartitsisunut killiliussat nalinginnaasut misissorneqartariaqarput.
- Nappaateqarnerat pissutigiinnarlugu aqqusiniinnarmut innersuunneqarsinnaanngillat imaluunniit pisortat inissaataannit matullugit, Naaja Nathanielsen naggasiivoq.