Ineqarnermut naalakkersuisoqarfiup allagai borgmesterip tupaallaatigai

Pisortani oqartussaasutut - kommuniugutta imaluunniit Namminersorlutik Oqartussaagutta - nunat tamalaat isumaqatigiissutaasa inuttullu pisinnaatitaaffiit malinneqarnissaat siuttuuffigissallugu pisussaaffigaarput, Kommuneqarfik Sermersuumi borgmesteri oqarpoq nangillunilu:

- Taamaammat allakkat aappassaanik atuarakkit eqqumiigalugillu assut tupaallaatigeqaakka. Immitsinnullu aperivugut inuttut pisinnaatitaaffinnik unioqqutitsinerunnginnersoq?

AAMMA ATUARUK Ineqarnermut naalakkersuisoqarfiup inuttut pisinnaatitaaffiit unioqqutippai

- Taamaammat tamatuminnga immikkut ilisimasalinnit misissortinnissaa pisariaqartilerparput. Inuttut pisinnaatitaaffiit pillugit Misissuisoqarfik Københavnimiittoq ikiortiseraarput. Suliaq misissorpaa naliliineralu erseqqilluinnarpoq, borgmesteri oqarpoq.

Innarluutillit pillugit isumaqatigiissummik unioqqutitsineruvoq
Kommunimut allakkat atuareerlugit Inuttut pisinnaatitaaffiit pillugit Misissuisoqarfik akissutimini naliliivoq Ineqarnermut Naalakkersuisoqarfiup tungaanit immikkoortitsisoqartoq.

Misissuisoqarfillu naapertorlugu, Naalagaaffiit Peqatigiit innarluutillit pillugit isumaqatigiissutaanni malittarisassanik atuuttunik Naalakkersuisunit pisussaaffigineqartunik unioqqutitsineruvoq.

Nunatsinni Inuttut Pisinnaatitaaffiit pillugit Siunnersuisooqatigiit aamma tupaallapput
Kalaallit Nunaanni Inuttut Pisinnaatitaaffiit pillugit Siunnersuisooqatigiit siulittaasuata Aaja Chemnitz Larsenip inuttut pisinnaatitaaffiit unioqqutinneqarnerat aamma tupaallaatigaa.

Taassuma erseqqissaatigaa, Kalaallit Nunaanni innarluutilinnut akisussaaffik pingaarnerusoq Namminersorlutik Oqartussaniimmat, taamaattumillu isumaqarnerarpoq Ineqarnermut naalakkersuisoqarfiup Naalagaaffiit Peqatigiit isumaqatigiissutaannik unioqqutitsinermi saniatigut aamma akisussaaffimminik qimarratiginnittoq.

Ineqarnermut naalakkersuisoq Sivert K. Heilmann oqaaseqartinniarlugu KNR-imit suli sulissutigaarput.