Aaja Chemnitz Larsen: Namminersorlutik Oqartussat akisussaaffitsik qimarratigaat

Tarnimikkut nappaatillit Namminersorlutik Oqartussat inissiaataannut innersuunneqartarunnaarneqarnissaannut tunngasoq Inuit Pisinnaatitaaffiinut Kalaallit Nunaata Siunnersuisoqatigiivisa immikkoortitsinertut nalilerpaat.
septembarip 11-at 2014 15:42

 
Ineqarnermut Naalakkersuisoqarfiup Kommuneqarfik Sermersuumut allagaqarsimaneranik Inuit Pisinnaatitaaffiinut Kalaallit Nunaata Siunnersuisoqatigiivisa  Inuttut pisinnaatitaaffiit pillugit Misissuisoqarfik Københavnimiittoq taperserpaa.
 
Tarnimikkut nappaatillit Namminersorlutik Oqartussat inissiaataannit allamut nuunneqarnissaanik peqqusineq immikkoortitsineruvoq,  Inuit Pisinnaatitaaffiinut Kalaallit Nunaata Siunnersuisoqatigiivini siulittaasoq Aaja Chemnitz Larsen oqarpoq.
 
Namminersorlutik Oqartussat tungaannit akisussaaffimmik qimarratiginninneruvoq akisussaaffillu tamaat kommunimut  tunniullugu, tamanna tupinnarpallaaqaaq, Aaja Chemnitz Larsen oqarpoq. 

Kalaallit Nunaanni tarnimikkut nappaatillit atugaasa annerusumik sammineqartariaqarnerat taassuma ujartorpaa.
 
AAMMA ATUARUK Ineqarnermut naalakkersuisoqarfiup allagai borgmesterip tupaallaatigai

Ineqarnermut Naalakkersuisoqarfiup Kommuneqarfik Sermersuumut allagaqaataa, tassalu tarnimikkut nappaatillit Namminersorlutik Oqartussat inissiaataannut innersuunneqarsinnaannginnerinut  tunngasoq, Inuttut pisinnaatitaaffiit pillugit Misissuisoqarfiup Københavnimiittup naliliinera  Aaja Chemnitz Larsenip  taperserpaa.

Misissuisoqarfiup naliliinera malillugu inuttut pisinnaatitaaffiit unioqqutinneqarput, Naalagaaffiit Peqatigiit innarluutilinnut nalunaarutaanni allassimammat immikkoortitsisoqassanngitsoq tamannalu malinneqarsimanngitsoq, Aaja Chemnitz Larsen oqarpoq.

- Isumaqarpunga tarnimikkut nappaatillit immikkoortinneqartut, Aaja Chemnitz Larsen Inuit Pisinnaatitaaffiinut Kalaallit Nunaata Siunnersuisoqatigiivini siulittaasoq taama oqarpoq.