Qaammatit tallimat qaangiuttut: Sukisaarsaartarfimmut isaariaq kaassuartagaqartunut suli naleqqussarneqanngitsoq
Qaqortumi innarluutillit sukisaarsaartarfiat Orniffik iserfigissagaanni tummerakkooqqaartariaqarmat, 47-nik ukiulik Poul Lauge tassunga sukisaarsaariaannaasanngilaq.
Poul Lauge qaratsaminik pisumik nukillaarnermik nappaateqarami kaassuartakkat atorlugit ingerlasariaqartarpoq. Orniffillu innarluutilinnut sukisaarsaartarfiugaluartoq, Poul Lauge tassunga isersinnaanngilaq.
- Unitsinnikuuara piumassuseeruteqqavunga, Poul Lauge oqarpoq.
- Ukiut pingasut Orniffimmiinngilanga qummukarlunga tummeqqakkoorsinnaannginnama.
Suliarineqarnissaa neriorsuutigigaat
Tassa Orniffik iserfigissagaanni tummeqqakkooqqaartariaqarmat, Poul Lauge tassunga sukisaarsaariarsinnaanngilaq. Najugaqarfimmut allamut kommunimit innersuunneqarnikuunnginnami utoqqaat illuanni najugaqarpoq. Orniffimmullu sukisaarsaariariaannaannginnami ilutiminik ataatsimooqateqartanngilaq.
Poul Lauge siorna novembarimi siullermeerluta oqaluttuaraarput, Orniffillu kaassuartakkanut 2024-mi aqquteqalissasoq Kommune Kujallermit taamanikkut neriorsuutigaat.
'Tamanna qaangerniarlugu suliaqartoqarpoq, naatsorsuutigineqarluni ukiumi nutaami tamatuma suliarineqarluni qaangerneqarsimanissaa'. Kommuni novembarimi allakkatigut akissumminni taama ilisimatitsivoq.
Sulili taamaaliortoqanngilaq. Tassa Orniffik kaassuartakkanut suli aqquteqalinngimmat, Poul Lauge Orniffimmut suli orniguteriaannaanngilaq.
Kommune Kijallerup innuttaasumut Poul Laugenimut akisussaaffini sumiginnaaraa 47-nnarnillu ukioqarmat utoqqaat illuanni najugaqartinneqarnera akuersaarneqarsinnaanngitsoq, innarluutillit oqaaseqartartuat Anja Hynne Nielsen novembarimi oqarpoq.
Pimoorussivillutik 2024-imi anguniagaannut ilaasoq
Kommunili ersarittumik siunertaqarpoq. Tassa innarluutilinnik sullissinermi 2024-imi allannguiniarpoq.
- Pimoorussivilluta 2024-mi anguniakkatsinnut aamma ilaavoq ornittakkat, taavalu aamma nammineq tamakkua angerlarsimaffimmik innarluutilinnut pilersitsiniarsarissalluta utoqqaat illuinut utoqqarnik aamma utaqqisoqartarmat.
- Aammalu tulluartuungimmat inuusuttut pensioninngitsut utoqqaat illuani najugaqartittarnissaat, Kommune Kujallermi inunnik isumaginninnermi ataatsimiititaliap siulittaasua Sofia Olesen (IA) 2023-mi novembarimi allakkatigut akissummini allappoq.
Sulili susoqanngimmat Poul Lauge utaqqikatappoq.
Aliikkutassaqartariaqaramilu utoqqaat illuanni najugaqatini sapaatit akunnerit tamaasa bingoqatigisarpai.
Kiserliorlunili aamma miserratiginngilaa.
- Kiserliorpunga. Maani illoqarfimmi ilaqutaqanngilnga, kisimiippungalu, taanna KNR-imut novembarimi oqarpoq.
- Najugaqartut allat ilagalugit ilaannikkut bingortarpunga, allanillu ataatsimooqateqarsinnaalluni nuannerpoq, taanna oqarpoq.
Allamik ornittagaqalernissaa aaqqiissutaasinnaanerpa?
Qaqortumi innarluutillit sukisaarsartarfiata kaassuartakkanik atuisunut suli iserfigiuminaannera kommunimiit qanoq iliuuseqarfiginiarneqarnersoq pillugu sisamanngormalli oqaaseqartitsiniaraluaratta suli akissutissarsinngilagut. Sofia Olsenili allakkatigut akissummini ima allappoq:
- Isumaginnittoqarfimmiit ilisimatinneqarpunga ornittagaq Nukissiorfimmiit pigineqartoq suliassartaqassammat annertuunik periarfissanik allanik ujartuillutik.
- Utoqqaat ornittagaat aamma innarluutilinnut ornittaganngussappat, illup matua, isaariaa, perusuersartarfia allallu aamma naleqqussarneqarlutillu tulluarsarneqassapput. Tamannalu pillugu teknikkeqarfimmut saaffiginnissuteqarpoq isumaginninnermut pinaveersaartitsinermullu ingerlatsivik. Utoqqaat ornittagaanni iluarsartuussassatut tikkuussat arlaqarput. Tassa innarluutilinnut atoruminarsarneqassappat annertuumik suliarineqartariaqassaaq.
- Iluarsartuunneqarnissaanulli suliaq missingersuutitalik naatsorsorneqarpoq, ataatsimiititaliamullu saqqummiunneqarumaarluni missingersuusiorneq sammineqalerpat.
Annertuumik innarluutillit angerlarsimaffiat Ivaaraq innarluutillit ulluunerani orniguffigisinnaasaattut atorneqarsinnaanersoq pillugu Kommune Kujallermiit Namminersorlutik Oqartussanut saaffiginnissutigineqarsimasoq tamannalu suli akineqarsimanngitsoq, Sofia Olesen ilanngullugu allappoq.
Tullianilu ataatsimiinnissartik qaqugu pissanersoq inunnik isumaginninnermi ataatsimiititaliap siulittaasuata akissumminni ilisimatitsissutiginngilaa.
Taamaammat Poul Lauge ilutiminik qaqugu ataatsimooqateqartalersinnaanersoq suli ilisimaneqanngilaq.
