Tasiilami meeqqat nunarsuaq postkortit aqqutigalugit takugaat

Atuarfimmi ilinniartitsisoq, Facebookikkut allagaq, atuartullu qaammaasaqarnerulersinnissaannut anguniagaq.

Tasiilami meeqqat atuarfianni atuartut nunarsuarmut ungasissumut takunnissinnaanerulernissaanut suliniutip iluatsilluartup ‘Postcards from around the World’-ip taakku imarai.

Ilinniartitsisup Ling Sing Yuenip Tasiilami atuarfimmi tuluttoortitsisup 4. klassimi atuartuutini peqatigalugit atuartut nunatta avataani nunarsuaq pillugu oqaluttuunnissaannut suliniut aallartippaa.

Taassuma Facebook aqqutigalugu inuit nunarsuarmi suminngaanneeraluarunilluunniit postkortimik nassiussinissaannik kaammattuuteqarfigai.

Tamanna atuartut – Ling Sing Yuenip januaarip ulluisa 13-iani allagaqarneranit nunanit 25-t missaanneersunit nunarsuullu immikkoortuinit arfineq-marlunnit postkortimik pissarsiaqarnerannik kinguneqarpoq.

Takorluugaqarluarsinnaanissaat neriuutigigaa

Atuartut postkortimik pissarsigaangamik nuna allakkamit nassiussiffiusoq nunarsuup assingani ujartortarpaat oqaluuseralugulu.

Ling Sing Yuenip nammineq Malaysiameersup atuartuutini nunarsuaq nunatsinnit Danmarkimiillu anginerungaatsiartoq periarfissarpassuaqartorlugu takutikkusullugulu takorluugaqarluarnissaannut kaammattorusuppai.

- Atuartuutinnut igalaamik ammaarusuppunga, oqaluttuullugillu nunarsuaq misigisaqarfiginiarunikku Danmarkimuinnaanngitsoq allanut aamma angalasoqarsinnaasoq, taanna oqarpoq.

Taanna nunarsuarmi pissarsiarineqarsinnaasunut assersuutissaavoq.

- Uanga Malaysiami peroriartorpunga, Danmarkimi ilinniariarlunga Tasiilami ilinniartitsisunngorpunga, maannalu ukiut pingasut Tasiilamiillunga, taanna oqarpoq.

Suliniut suli ingerlavoq, taamaammat nunarsuarmi sumiiffimmit allameeruit allagaqarusukkuillu suli taamaaliorsinnaavutit.