Innarluutillit ornittagaata tummeraqarnera kommunimit aaqqinneqarsinnaanngikkallarpoq
NAQQIUT: Borgmester Stina Egede (IA) suliamut tunngatillugu oqaaseqarusunngitsoq allaaserigaluarparput. Tamannali kukkuneruvoq. Kukkunerput ajuusaarutigaarput.
Poul Lauge Qaqortumeersoq 47-nik ukioqarpoq, timimigut nukillaarsimalluni kaassuartakkanillu issiveqartuulluni.
Illoqarfiup innarluutilinnut ornittagaata tungaanut qamutinut kaassuartagalinnut tulluartumik aqqusiornissaq ukiut pingasut sinnerlugit utaqqisimavaa. Taamanilimi ornittagaq illumut majuartarfilimmut nuunneqarpoq – majuartarfeqarpormi sisamanik allugassanik qamuteqartuulluni atorsinnaanngisaanik.
Ornigussinnaasannginnini pillugu Poul Laugep ataatsimuualaaqatigisartakkani amigaatigeqai – sulilu maqaasigallartariaqassavai.
Ataatsimiititaliami siulittaasoq Sofia Olesen (IA) suliamut atatillugu toqqaannartumik oqaaseqarusunngilaq. KNR-imulli oqarpoq innarluutillit atugaat pimoorullugit aappaagu 2024-mi aatsaat sammineqalerumaartut:
- Ataatsimiititaliami kingullermik ataatsimiikkatta eqqartorsimavarput 2024-mi annerusumik innarluutillit sammineqassasut. Soorunami inunnik isumaginnittoqarfiup iluani suliassat amerlaqaat, kisianni aalajangerpugut innarluutilittagut Kommune Kujallermi atugarisaat sapinngisamik tamatigut pitsanngorsarnissaat aallartissagipput. Ingerlakkaluarparput, oqarpoq.
Poul Lauge utoqqaat peqatigalugit utoqqaat illuanni najugaqarpoq – taamaammat 47-innarnik ukioqarluni kiserliornartorujussuuvoq, nassuiaavoq.
Kiserliorluni inuunermini ornittagaliarsinnaasarnini taamaammat pinngitsoorsinnaanngisamisut isigaa.
- Kiserliorpunga. Maani illoqarfimmi ilaqutaqanngilanga, kisimiippungalu, Poul Lauge KNR-imut oqarpoq.
Neriorsuisinnaanngilaq
Tamannarpiaavoq inuit innarluutillit pillugit oqaaseqartartup Anja Hynne Nielsenip uparuarnikuusaa. Taanna isumaqarpoq kommunip illoqarfimmi innarluutilittamik ornittakkamut imminnorpiaq sanaajusumut ornigussinnaannginneranik maalaarutit kinguarsarneqarlutillu iliuuseqarfigineqanngitsut.
Ataatsimiititaliamili siulittaasup Sofia Olesenip ajornartorsiut annerujussuunerarpaa. Qaqortoq innarluutilittaminnut ornikkuminarsaanissamik ajornartorsiuteqartuni kisiartaannglaq:
- Qaqortumiinnaanngilaq. Nanortalimmi aamma isaariamik ajornartorsiuteqarput. Piaartumik massakkut aaqqiiffigineqarnissaa sulissutigineqarpoq. Neriussuunga siunissami qanittumi isaariaa aaqqinneqassasoq isersinnaanngortillugit, oqarpoq.
Kommunip innarluutilittaannut atugassarititat immikkut iliuuseqarfiginissaat atugassarititallu ataavartussamik pitsanngorsarnissaat siunniunneqarpoq. Kisianni neriorsuuteqarusuppallaanngilaq:
- Neriorsuisinnaanngilanga, kisianni tassa tamaviaarluta ataatsimiititaliami sulivugut. Siunissami anguniakkatta ilagivaat angerlarsimaffeqalernissaat utoqqaat illuanniikkunnaarlutik, oqarpoq nangillunilu:
- Neriuppunga siunissami sulisussanik inunnik aamma angerlarsimaffeqalernissaat angujumaassallugu. Oqarsinnaanngilali uaneerakasik pissasoq. Kisianni sulissutigissavarput pimoorullugu. Sukataarutigissavarput, ataatsimiititaliami siulittaasoq Sofia Olesen oqarpoq.
