Sermersuaq avammut siornatigorninngarnit siaariartulertornerusoq

Kalaallit Nunaata sermersuata ilorpasittoortaa avammut procentit tallimat 15-illu akornisa misaannik 1959-iminngarnit siaariartulertorneruvoq.

Ilisimatusartut Danmarkimi nunatsinnilu nunap qanoq issusianik misissuisarfimmeersut, tassa De Nationale Geologiske Undersøgelser for Danmark og Grønlandimeersut (GEUS) misissuineranni tamanna erserpoq.

Ilisimatusartut taakkua Ilulissat kangianni Sermeq Kujallerup eqqaani sermeq qanoq siaariartulertiginersoq misissorpaat. Sermeq misissuiffigisaat sermersuup sinaaniit kilometerit 100-t missaannik ilorpasitsigisortaaniippoq.

Sermerup qanoq pissusia ilisimatusarfigineqarnerusariaqartoq, ilisimatusartut misissuisut taakkua oqarput.

Suna pissutaanersoq nalornisigigaat

Sermeq sukkaqaluni sermersuup sinaanut nikikkiartortoq arajutsisimanngikkitsik, GEUS-imi ilisimatusartuuneq matuminngalu misissuinermit atuakkiortuni pingaarnertut allaatiginnittuusoq Anja Løkkegaard tusagassiorfinnut nalunaarpoq.

- Sermerup Sermersuup qiterpasissuaniittup avammut siaruaannera kingaannerussangatikkaluarparput, taamaanngitsorli misissuinitsinni uuttuinitta kingulliit takutippaat, taanna oqarpoq.

Sermerup nunarsuup kianneruleriartorneranit sunnerneqartarnerani sunerpiaq allanik pisoqartarnersoq suli ilisimaneqanngitsoq, ilisimatusartut oqaatigaat.

Sermersuup avammut ukiut 65-it matuma siornatigorninngarnit siaariartulertornerunera sumik pissuteqarnersoq ilisimatusartut nalornissutigaat.

- Misissuinitsinni paasisavut aallaavigalugit sermip sannai tagiullutik iloqissiortarnerat (creep stability) pissutaassangatipparput. Pissutaassangatitarpaaluttali ilagiinnarpaat, Anja Løkkegaard oqarpoq.

Imaq qaffakkiartortoq

Creep stability sermip sannaasa imminnut tagiullutik iloqissiornerannut taaguutaavoq.

Sermip sannaasa iloqissiortarnerat nassuiaataassangatikkallarneqarpoq. Sermimmi sannai ima ititigisumi tagiuttarput, allaat tasamunga pilluni misissornissaat ajornakusoorluni.

- Sooq taama pisoqartarnera qularnaannerusumik paasisinnaagaluarutsigu, sermip iluani sumi taama pisoqartarnersoq taamalu pisoqarnera sermersuup allanngoriartorneranut qanoq isumaqarnersoq paasisinnaalissagaluarparput, Anja Løkkegaard oqarpoq.

Imaq qanoq qaffakkiartortigissanersoq missiliorsinnaajumallugu sermersuup qanoq siaruaatilertornerutigineranik misissuinissaq pingaartoq, ilisimatuut oqaatigaat.