47-nik ukiulik Poul Lauge innarluuteqarpoq, kiserliorpoq utoqqaat illuannilu najugaqarluni
Poul Lauge qaratsamit pisup kingunerisaanik nukillaarnermik innarluuteqarpoq, taannalu Qaqortumi utoqqaat illuanni Ajarsivasimmi najugaqarpoq.
Poul ukiut arfineq-marluk kingulliit utoqqarmiuniippoq. Poul Laugellu 47-nnarnik ukioqarluni kommunimit utoqqarmiunut sooq inissinneqarsimanini paasisinnaanngilaa.
- Kiserliorpunga. Maani illoqarfimmi ilaqutaqanngilanga, kisimiippungalu, taanna oqarpoq.
Kommune Kujalliup Poul Laugemut tunngatillugu suliaq aalajangersimasumik oqaaseqarfigiumanngilaa. Kommunimi innarluutilinnut, utoqqarnut soraarnerussutisialinnullu ingerlatsivimmi pisortaq, Maline Lyberth KNR-imut allakkatigut akissuteqarpoq:
- Pissutissaqartillugu inunnik innarluutilinnik utoqqaat illuanut inissiisoqarsimatillugu, periarfissaavoq sapaatip akunneranut akunnerit aalajangersimasut atorlugit ingiaqateqartitsisinnaaneq. Assersuutigalugu allakkerivimmut pisiniarfimmut ingiaqateqartinnani orninniakkat orniguffigisinnaanngippagit, taanna oqarpoq.
Innarluutillilli illersuisuata Anja Hynne NIelsenip oqarnera naapertorlugu Kommune Kujalliup pineqartumik utoqqalisimanngitsumik utoqqaat illuannut inissiineranut utoqqatsissutissaqanngilaq.
- Akuersaarneqarsinnaanngilaq, taanna oqarpoq.
Anja Hynne NIelsenip Innarluutillit pillugit isumaqatigiissummi artikel 19 innersuussutigaa, tassani inuit innarluutillit sumi qanorlu najugaqarsinnaanissartik namminneq aalajangersinnaatitaagaat allassimavoq.
- Poul Lauge kissaatiminik pisariaqartitaminillu oqaaseqarsinnaalluarpoq. Taamaammat tusaaniarneqarluni iliuuseqartoqannginnera paasisinnaanngilluinnarpara, Anja Hynne Nielsen oqarpoq.
Innarluutillit illersuisuatali oqarnera naapertorlugu inuusuttut innarluutillit utoqqaat illuinut inissinneqartarnerat nunatsinni nalinginnaasumik ajornartorsiutaavoq.
Kaassuartakkanik atuisunut isaariaqanngitsoq
Poul Lauge ikiuisinnaasumik Ajarsivasimmit ingiaqatissaqaraangami innarluutillit sukisaarsaartarfianukarluni kiserliornini annikillisissinnaasaraluarpaa.
Nutaamilli ajornartorsiuteqalerpoq. Innarluutillit sukisaarsaartarfiat Orniffik nuunneqarmat silataani isaarialimmut inissinneqarpoq, orniffiullu kaassuartakkanik atuisunut tulluarsarnissaanut kommuni iliuuseqarsimanngilaq.
-Ukiut pingasut Orniffimmiingilanga qummukarlunga tummeqqakkoorsinnaanginnama, Poul Lauge oqarpoq.
Innarluutillit illersuisuata oqarnera naapertorlugu nunatsinni kaassuartakkanik atuisut sumiiffinnut namminersortunut kikkulluunniit ornittagaannut nikeriarsinnaannginnermut assingusumik ajornartorsiuteqartut amerlapput.
- Iseriartortunut majorallaffimmik sananeq ukiunik pingasunik sivisussuseqartariaqanngilaq. Kommunip suliamik piffissami taama sivisutigisumik kinguartitsisimanera paasissaanngilluinnarpoq. Kisianni inunnut innarluutilinnut tikinneqarsinnaatitsinermut atatillugu tamani kingulerussaaqqalluinnarpugut. Tamanna inunnut isigiarsuttunut aalasaatimikkullu innarluuteqartunut atatillugu, Anja Hynne Nielsen oqarpoq.
Ataatsimoornermut ilaatinneqannginneq
Poul Laugep orniffimmut takkussinnaannginnera inuiaqatigiinnut ataatsimoornermullu ilaatinneqannginnertut misigisimanarpoq.
- Oqaloqatissannik amigaateqartarpunga, assersuutigalugu kammalaatit illoqarfimmeersut, taanna oqarpoq.
Ataatsimoornermullu ilaatinneqannginneq kingunerluuteqangaatsiarsinnaasoq, Innarluutillit Illersuisuat nassuiaavoq.
- Kiserliorneq tamatta nalaassinnaavarput, tamanna isumatsassimaarnermik allanillu kinguneqarsinnaavoq, Anja Hynne Nielsen oqarpoq, nangillunilu:
- Isumaqarpunga kikkut tamarmik innarluutinikkaanni inuiaqatigiinnit iliuuseqartoqartarnissaa naatsorsuutigisaraat. Kisianni una allatulli atugassaqartitaanissamut salliutinneqanngittarnermut takussutissaavoq.
Taassuma oqarnera naapertorlugu Kommune Kujalliup innuttaasumut Poul Laugemut akisussaaffini sumiginnarpaa.
Poul Laugemut tunngatillugu kommunip Inuit Innarluutillit pillugit Isumaqatigiissummi artikelit arfinillit tikillugit sumiginnarai Anja Hynne Nielsen isumaqarpoq. Tamatumani artikel 20 inuttut nikeriarsinnaannginneq aamma artikel 9 tamanut tikikkuminartuunissaq ilaatigut ilaapput.
- Kommunip pineqartumik oqaloqatiginnilluni qanoq aaqqiissuteqartoqarsinnaanera periarfissaqarneralu misissussagai annikinnerpaamik naatsorsuutigineqarsinnaavoq, Anja Hynne Nielsen oqarpoq.
Kommune Kujalliup Orniffiup isaariaani kaassuartakkanik atuisunut tikikkuminartuutitsinissaq amigaataasoq ilisimallugu allakkatigut akissutigaa. Kommunip innarluutilinnut orniffiit kaassuartakkanik atuisunut 2024-mi tikikkuminartuutilernissai naatsorsuutigaa.
