Uummannap eqqaani qaqqanik sisoortoqarsinnaaneranik naliliineq nutaaq

Aatsitassanut oqartussaqarfik Uummannap eqqaani qaqqanik sisoortoqaratarsinnaaneranik nutaamik naliliipput. Umiammakku Nunaanni qaqqani ajornerulertoqarneranut takussutissaqanngilaq.

Allattoq Markus Valentin

novembarip 04-at 2026 13:59

Illorsuarmiut Nuugaatsiarmiullu angerlarusupput.

KNR-ip innuttaasut nunaqarfiit ukioq naallugu najugaqarfigineqarsinnaaleqqillugit ammaqqinneqarnissaannik kissaateqartut juunimi oqaloqatigai.

Nunaqarfiit qaqqamit sisoortoqarnerata kingunerisaanik tassaarsuaqarnerata kingorna matuneqarput.

Aamma atuaruk Eqikkaaneq: Naalakkersuisut Illorsuit ammaqqissallugu kissaatiginngikkallarpaat

Inatsisartuni politikerit nunaqarfiit ammaqqinneqarnissaat isumannaatsuunersoq taamanili oqaluuserilerpaat.

Nunatsinni aatsitassanut oqartussaqarfik sumiiffimmi pissutsinik nutaamik naliliivoq.

Naalakkersuisut Illorsuit ammaqqinneqarnissaat pillugu

Isorliunerusunut naalakkersuisup, Iddimanngiiu Jensen Biancop (IA) qaqqanik ukiut 50-it ingerlaneranni sisoortoqangajalerneranut takussutissaqanngitsoq oktobarip 22-anni oqaatigaa.

- Nunalli ukiut 50-it tulliuttut ingerlaneranni sisooratarsinnaanerata ilimanaateqarneranik ataatsimut naliliinermut allanngortitsinngilaq, taanna oqarpoq.

Taamaattumik Naalakkersuisut Illorsuit ammaqqinnissaannut taarsiullugu, isumannaallisaanikkut suliniutinik pilersaarusiortoqarnissaa siunnersuutigaat.

Siunnersuut Sanaartornermut Ataatsimiititaliamut maanna suliassanngortinneqareerpoq.

Allisiguk

Naliliineq nutaaq

Aatsitassanut oqartussaqarfik naliliinermi nutaami qaqqat pingasut: Umiammakku Nunaat, Kangerluarsuk aamma Sullorsuaq misissuiffigai.

Umiammakku Nunaanni qaqqani nakkutigineqartuni nikikkiartuaarnertut ujaqqallu sisoornerisut ittunik suli pisoqartoq sapaatit akunnerisa sisamat kingulliit takutippaat.

- Ukiup nikinnerata missaani nunap iluata qerinissaata tungaanut ingerlaannartussatut naatsorsuutigineqarluni. Annertunerusumik qaqqanik sisoortoqarnissaanit pitsaanngitsumik ineriartortoqarneranut suli takussutissaqanngitsoq takuneqarpoq, Aatsitassanut oqartussaqarfik oqarput.

Aamma atuaruk Illorsuarmiut Nuugaatsiarmillu: -Angerlaqqikkusuppugut

Umiammakku Nunaanni ukiaanerani nakkutilliineq ukiut sisamat siuliini nakkutilliinertulli ippoq.

Kangerluarsuup sivinganerani sinerissamut qanittumi nikikkiartuaarnerit annertusiartortut ujaqqallu sisoortarneri akulikilliartortut nalunaarsorneqarpoq.

- Sivinganerup ilaa ataqatigiinngorluni imanut sisusinnaavoq aammalu sumiiffimmi mallit qarsutsinerat aallartitissinnaallugu, kisianni sumiiffinnut inoqartunut navianartorsiortitsinngitsumik.

Qaqqat sisoortarnerinut suleqatigiit Sullorsuarmi Ataata Paatutullu eqqaaniittut nakuutigaat.

- Sumiiffiit marluusut tamarmik sisoortuni ataqatigiinni assigiinngitsuni nikikkiartuaartoqartoq takutitsipput, oqartussaqarfik allappoq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.