USA-p Nuummi konsuleqarfini malunnaatilimmik allilerniarpaa

Trumpip atorfilittaasa konsuuleqarfik Nuummiittoq 17-ininik sulisoqalersissallugu pilersaarutigigaat, Politiken allappoq.
Assi © : KNR / Markus Valentin
Allattoq Ritzau
novembarip 06-at 2026 07:27
Nutserisoq Brian Jensen

USA-p nunatta illoqarfiisa pingaarnersaaniinnini, Nuummiinnini malunnaatilimmik ilaartorniarpaa. 

Politikenip allagaatinik takunnissinnaatitaaneq tunngavigalugu misissuinermini paasisimavaa, Amerikami nunanut allanut ministereqarfiata allagaataani atuarneqarsinnaasoq USA-p Nuummi konsuuleqarfini nutarterlugulu allilissallugu pilersaarutigigaa. 

USA pilersaarummut 167 millionit koruuninit 214 millionit koruuninut aningaasaliisimavoq. Konsuuleqarfimmi sulisut 17-it missaanniilissasut, taakku siorna sulisunit sisamariaammik amerlanerussallutik, Politiken allappoq.

Aviisip paasissutissat niuernermut tunngasunik suliaqarfimmeersumit, Bureau of Overseas Buildings Operationsimit (OBO-mit) nassiunneqartut, USA-p nunanut allanut tunngasunut ministereqarfianut atasumit pissarsiarai.

Konsuuleqarfik nutaaq 2.784 kvadratmeteritut annertussusilik “aallartitaqarfittut nalinginnaasutut politikikkut sunniuteqarlunilu pissaanilittut” atorneqassaaq. 

Ilisimatusartuuneq Rasmus Sinding Søndergaard, Dansk Institut for Internationale Studierimi (Diis-imi) USA-p nunanut allanut politikkia pillugu ilisimatusartoq, taama oqarpoq.

- USA-p taama iliornera paasissutissanit pisanit ilimagisamit annerungaarpoq. Pilersaarutai nunat allat nunatsinni sinniisoqartitsisarnerinut, aammali USA-p nunani allani mikisuni allartitaqartarnerinut sanilliullugu. 

Pilersaarutit malunnaatillit

Inuit 17-it sulisoriniarneri malunnaateqartorujussuupput amerlallutillu, taama atsigisunik atortulersuiniarnernut, konsuuleqarfiullu nutarterlugulu allinernissaanut aningaasanik taama amerlatigisut atuisoqartussaammat, Politikenimut oqarpoq. 

EU-p Nuummi allaffeqarfeqarnera sanilliukkaanni tassani sulisut sisamaapput, Canadalu inummik ataasiinnarmik nunatsinni sinniisoqartitsilluni, Politiken allappoq.

USA-p Nuummi konsuuleqarfini 2020-mi ammarpaa, 1953-imiilli matoqqareerlugu. USA-p konsuuleqarfini nutaaq anginerusorlu ukioq manna iserterfigivaa, ilarujussuali maanna atorneqanngilaq, Politiken allappoq. 

USA-p præsidentiata Donald Trumpip USA-p Kalaallit Nunaat, Naalagaaffeqatigiinnermut ilaasoq, aqulerusullugulu pigilerniarnerarlugu arlaleriarluni oqaatigisarpaa, taassumami isumaa naapertorlugu Kalaallit Nunaat USA-p isumannaatsuunissaanut pingaaruteqarluinnarmat.

USA, Kalaallit Nunaat aamma Danmark Kalaallit Nunaat pillugu isumannaallisaanermut illersornissamullu isumaqatigiissummik nutaamik septembarip qaammataata naanerani, sivisuumik isumaqatiginninniartoqareersorlu isumaqatigiissuteqarput.

Donald Trump Naalagaaffiit Peqatigiit  Ataatsimeersuartitsinerani oqalugiareersorlu, isumaqatigiissut New York Citymi Naalagaaffiit Peqatigiit illorsuanni atsioqatigiinneq nalliuttorsiualaarutigalugu pivoq.

Isumaqatigiissut USA-mut Kalaallit Nunaanni sakkutooqarfinnik marlunnik nutaanik pilersitsinissamut akuersissummik ilaatigut imaqarpoq. USA nunatsinni ataatsimik maanna sakkutooqarfeqareerpoq. Taanna Pituffik Space Basemik taaguuteqarpoq, nunatta avannaaniillu.