USA-p aallartitartaavata nunatsinni isumannaallisaanermi suleqatigiinneq pitsanngorsarniaraa

Amerikamiut aallartitaata nutaap USA-p Danmarkillu akornanni atassuteqarneq pitsanngorsarusullugu erseqqissaatigaa.

Ken Howery Københavnimi Christiansborgimi pingasunngornermi oqaloqatigiinnerup kingorna oqarpoq.

- Pingaarnerutitagut illersornissaq isumannaallisaanerlu pillugit suleqatigiinnitta pitsanngorsarnissaanik, niuernerup aningaasaliinerullu qaffassarnissaanik aamma issittumi – pingaartumik Kalaallit Nunaanni isumannaallisaaneq pillugu tamatta ernumassutigisagut pillugit suleqatigiinnissatsinnik ilaqarput, taanna oqarpoq.

Apeqqut itigartitsissutigineqartoq

Tusagassiortup aallartitaq nutaaq Kalaallit Nunaannut, amerikamiut præsidentiata Donald Trumpip aqutsiffigilerusullugu oqaatigisimasaanut nunallu tamalaat akornanni uitsatigineqartumut tunngatillugu apeqquteqarfiginiaraluarpaa.

Aallartitanngoqqammersumulli atorfeqartup apeqqut piffissaqarfigineqannginnerarlugu itigartitsissutigaa.

Donald Trumpip USA-mi præsidentitut januaarimi ivertinneqarneraniilli atuuffigineqanngilaq.

49-nik ukiulik teknologimik pilersitsisartoq Danmarkimi aallartitassanngortinneqarnissamut oktobarimi akuerineqarpoq. Taanna Sverigemi siornatigut aallartitaavoq, Danmarkimullu sapaatip akunnerata matuma siorna tikilluni.

Howery aningaasaqarnermik ilisimasalittut ilinniarsimasuuvoq, Texasimeerlunilu. Taannalu nunarsuarmi akiliinermut atortumik PayPalimik ilaatigut aallarneeqataasutut iluanaaruteqarluarsimalluni.

Kunngeqarfimmi angalaniartoq

Taanna Danmarkimi aallartitatut pisortatigoortumik maanna atuutilereerluni danskit naalakkersuisunik, inuussutissarsiornermit, sakkutooqarnikkullu ataatsimeeqateqarnissani qilanaaralugit pingasunngornermi oqarpoq.

- Nunatta akornanni atassuteqarnerup qanoq nukittutiginerata eqqaamanissaa pingaaruteqarpoq, taanna oqarpoq, Sorsunnersuullu kingulliup kingorna illersornissamut suleqatigiiffimmik Natomik pilersitseqatigiissimasugut erseqqissaatigalugu.

Howeryp oqarnera naapertorlugu Danmarkip USA-llu naalagaaffiit akornanni atassuteqarnerat ukiuni 225-ni ”unitsinneqarsimanngilaq”.

- Innuttaasut naapinnissaat aamma kunngeqarfimmi kulturip ilikkagaqarfiginerunissaa kiisalu kunngeqarfiup ilaanut matumani Savalimmiunut Kalaallit Nunaannullu angalanissat ilanngullugit qilanaaraakka.

/ritzau