Múte B. Egede partiit siuttuinik katersortitsisoq - USA-liarluta killiliisariaqarpugut

USA-p præsidentianut tullersortaasup nulia, Usha Vance, nunatsinni partiit qinersinerup kingorna naalakkersuisunngortitsiniarlutik isumaqatigiinnialeruttorfianni, Nunatsinnut tikeraassalluni nalunaarpoq.

Tikeraarniarneq kalaallinut qisuariartitsiniarnerusoq ulorianartoq, Naalakkersuisuugallartut siulittasuat Múte B. Egede isumaqarpoq. 

- Taamatut sunniiniartumik pissuseqarneq tamat oqartussaaneranik nunatsinni arlaatigut innarliiniarnertut imaluunniit sunniiniarnermik ingerlatsivigineqartoq ataqqinninnginnermik aallaaveqarmat, taamatut oqariartorpunga.

USA-p præsidentiata tullersortaata, J.D. Vancep nulia, Usha Vance, sisamanngorpat nunatsinnut tikeraassaaq. Taanna Nuummut, Pituffimmut Sisimiunullu angalassalluni pilersaarpoq.

Amerikamiut timmisartorsui, Herculesit marluk Nuup mittarfissuanut sapaammi mipput, tassanilu biilit sisamat Nuummut niuneqarput.

USA-llu iliuusaa nunatsinnut ataqqinninnginnerujussuarmik takutitsinerusoq, naalakkersuisuugallartut siulittaasuat, Múte B. Egede KNR-imut oqarpoq.

- Isumaqarpunga pisortatiguunngitsumik oqaraluaraanniluunniit tikeraartoqalersoq allatut aamma nalilerneqarsinnaasoq. Isumaqarpungalu ataqqinninnginnerujussuarmik takutitseqqittoqartoq.

-  Naak aamma ersarisaaffigineqareeraluarlutik naalakkersuinikkut inissisimaffipput aallaavigalugu, aatsaat naalakkersuisunik nutaanik peqalerpat naapitsisinnaanerit allallu ingerlasinnaasut taanna tusaanagu ingerlatsisoqarmat, taanna oqarpoq.

Nunatsinni iliuutsit naammanngitsut

USA-p præsidentia nunatsinnut pisiarinnikkumalluni, pisariaqarpallu sakkulersorluni tiguaaniarluni oqariartoreersoq nunatsinni sumiiffinni arlalinnik akerliussutsimik takutitsisoqarpoq.

Nunatsinnilu partiit siuttui ilutigisaanik ataatsimoorlutik, pisumut akerliunerminnik takutitsillutik oqariartuuteqarput.

Taamaaliornerli naammanngitsoq, Múte B. Egede oqarpoq.

- Orniguttoqartariaqarpoq kiinnerluni, ikinngutigiit iligiillu akunnerminnik taama pissusilersorfigineq ajorput, killissarput takutinneqartariaqarpoq.

- Nalunngilarput ulluni kingullerni piffissamilu aggersumi inuit anersaaq taanna pigalugu suli inissisimassasut. Toqqissisimaneq nunatsinni pigisariaqarparput, naalakkersuisunngortussallu nutaat suliarisariaqarpaat piaarnerpaamik USA-p taamatut pissusilersornerani killiliinissap toqqammavilernissaa.

Pisullu suli pigaluttuinnarput tassami USA-mi præsidentip tullersortaata nulia uani sapaatit akunneranni tikilerpoq.

Taannali sioqqullugu nunaniit iligisatsinniit tapersersorneqarnerput nunani tamalaani tusagassiuutitigut nalunaarutigineqarpoq. Tamannali ersarinngippallaartoq, naalakkersuisuugallartut siulittaasuat oqarpoq.

- Taama ersaritsigisumik suli takunngilagut nunat iligut oqariartortut. Aamma pisariaqartipparput nunat ikinngutigisagut. Taamaammat ersarinnerusariaqalersut, allatut ajornaqaaq. Tamakkiisuunngitsumik oqariartortaqattaarneri taakkua killeqartariaqarput.

- Ingerlariaqqittariaqarpugut. Nunatsinni innuttaasut maaniippugut, uagut nunaqarniarluta maani, aamma kinguaatsinnut ingerlateqqissallugu. Toqqisisimatinngerusaarneqarsinnaanngilagut taama sivisutigisumik.

Múte B. Egede nunatsinni innuttaasut akerliunermik takutitsinerminnik attassiinnarnissaanik ilanngullugu kaammattuuteqarpoq. Taamaaliornikkut killiliinermik takutitsinerussasoq, taassuma ilanngullugu oqaatigaa.