Ullormut nalunaarut: Umiatsiap kinngunerata kingorna maqaasisaqartoqanngilaq - ujaasineq unitsinneqarpoq
Kalaallit Nunaanni Politiit Aasiaat eqqaanni Saattuarsuit tunuanni umiatsiaq kinngusimasoq pillugu paasissutissanik ippassaq ujartuipput.
Politiit angallat pillugu marlunngornermi ullup-qeqqanut kalerrinneqarput, tamatumalu kingorna politiit angallataat Aasianneersoq silaannakkullu ujaasissutit atorlugit SAR-imik ujaasineq aallartinneqarpoq, Kalaallit Nunaanni Politiini sillimasut pisortaat Malik Olesen oqaluttuarpoq:
- Ajoraluartumik nutaanik maannamut paasissutissaateqanngilagut. Taamaattumik uagut aamma maannakkut ujaasititsinngilagut, sillimasut pisortaat oqarpoq.
Taassuma sumiiffimmi aamma maqaasisaqartoqanngitsoq oqaluttuaraa.
- Suliaq tamakkiisumik suli naammassinngilarput, kisianni navianartorsiorpasittoqanngilaq, Malik Olesen oqarpoq.
Sillimasut pisortaata inuit umiatsiaq pillugu paasissutissaateqarunik politiinut 70 14 48-mut attaveqaqqullugit kajumissaarpai.
Pinngitsaaliilluni atoqatiginninneq toqumillu sioorasaarinerit
Nuummi politiit angut aalakoortoq ’nipituuliortoq’ marlunngornermi unnukkut aamma ikiortariaqarsimavaat. Politiit ilaat angummit aalakoortumit tassani toqumik sioorasaarneqarpoq, Malik Olesen oqaluttuarpoq.
- Suliamik aallartitsivugut, pineqartorlu inunnut navianartorsiortitsisarsimanini pissutigalugu ilisimaneqareerpoq, taamaattumik eqqartuussivimmut sassartinneqassanersoq sassartinneqassannginnersorluunniit maannakkut nalilersuleruttorparput.
Angut meeqqamik pinngitsaaliilluni atoqateqarsimasutut aamma marlunngornermi tigusarineqarpoq. Tamanna Nuussuarmi najukkat ilaanni pivoq.
- Suliaq taanna suliaraarput pasineqartorlu ullumi sassartinneqassannguatsiarpoq, Malik Olesen oqarpoq.
Politiit nalunaarut aallaavigalugu tigusarinnipput.
