Ullut seqinnarissiorfiit aggersut
Naqitsiniisaffik Kalaallit Nunaata kitaata kujataa ulluni makkunani anorlertitsillunilu siallertitsivoq. Uummannamiit kujammut Paamiut ilanngullugu siallerpoq - taamaalaarallassallunilu.
Silaannaap kiattup Kitaani anoraasup silaannaq nillertoq Canadameersoq, maanna silap taamaanneranut aalajangiisuusoq, apormagu, aasap silaata taamatut allanngorarneranut peqqutaavoq. Taamalu aporneq maanna siallernersuanut peqqutaasoq, DMI-p silasiorfiata Nuummi immikkortortaneersoq Jens Lindskjold oqaluttuarpoq.
Massakkorpiaq igalaakkut itsuarnermi sialuk anorilu malugineqarsinnaagaluartut qilanaarfissaavoq, qujanartumimmi sila atoruminarsilerpoq. Ullumi aqagulu ullut anigorallaannartariaqarparput.
Unerisimaneq seqinerlu misigineqalersut
Silap pingasunngorpat ullaakkut allarluinnaanissaa ilimanarpoq.
- Pingasunngornerup ingerlarnerani siallerunnaassaaq, seqinnilissaaq silalu unerilluni. Sapaatit akunneratalu naanissaanut taamaassaaq, Jens Lindskjold oqarpoq.
Kiassusersiut kiatsinneranik takussutissiinngikkaluartoq, nikallungaffiusarisaqanngilaq. Saqqaartanimi kiassaaq, taamaammallu silaannarillunilu allaaqqimmat, silagissiorfissaqqissaaq.
- Silannaqarfimmi suli nillertumiikkaluarluta nikallussanngilagut – taamaakkaagammi Kalaallit Nunaat silaginnerpaasarpoq. Isugutassanngilaq seqinnissallunilu.
Atoruminarsinissaa silamuinnaq sunniuteqarnani, silaannakkut angallattunut -piffisami kingullermi kinguaattooqattaartunut - aamma atoruminarsissaaq, Jens Lindskjold oqaluttuarpoq.
Aasaq nalinginnaanerulissasoq
Aasap sinnerani silap qanoq ikkumaarnera Jens Lindskjoldip oqaatigisinnaanngilaa, nunatsinnili aasaasarneratut ikkumaassasoq ilimanaqaaq, seqinnertarluni panernartaluni ullunilu allani siallertarluni allangorarluni.
-Taamaattuaannassaarmi. Aasami sapaatit akunnerisa ilai ajunnginnerupput ilaalu pitsaannginnerusarlutik.
Qilanaarnissamullu massakkorpiaq pissutissaqarpoq. Sapaatimmi akunnerisa 28-anni seqinnarittarnissaa ilimagisinnaavarput. Qularutissaanngilaq pingasunngornermiit atoruminarsiartulissasoq.
