Akitsuutinik qaffaanissamut ulloq killiliussaq Trumpip kinguartippaa

Nunat arlallit pillugit akitsuutinik qaffaaniarnissamut killiliussaq atuutilertussaq kinguartinneqartussanngorlugu, USA-p præsidentia, Donald Trump, taama nalunaaruteqarnermik atsiorpoq.

Det Hvide Hus naapertorlugu tamanna nalunaarutigineqarpoq.

Killiliussaq siulleq juulip quligiluaaniikkaluarpoq. Maanna aggustip aallaqqaataanut kinguartinneqarpoq.

Nunanit arlalinnit niuerutigineqartartunit akitsuusersuilernissani, Trumpi apriilip aallartinnerani nalunaaruteqarpoq. Ulloq taanna taavaa "Liberation Day" – (danskisut: befrielsesdagen).

Ulloq taanna akitsuutit atuutilermata, USA-p præsidentia aalajangerpoq, taakku ilaat ulluni 90-ini unitsikkallarlugit, taamaalilluni amerlanerpaat akornanni akitsuusiineq procentinik qulinik appasinnerulerpoq. Taannaavoq unittitsigallarneq pingasunngornermi naasussaagaluartoq.

Nutaamik killiliussaq aalajangersimasuunersoq, Trump aperineqaqqammerpoq.

Tamanna Det hvide Husimi nerersuartitsinermi pivoq, tassani aamma Israelip ministeriunerata, Benjamin Netanyahu peqataavoq.

– Oqaqqissaguma, aalajangersimavoq – kisianni 100 procentimik aalajangiunneqarsimanngilaq, AFP naapertorlugu Trump oqarpoq.

Nunat aqqaneq marluk akitsuummik nalunaarutisissapput

Japanimut Korea Kujallermullu akitsuummik nalunaarutit, Truth Socialimi, Trumpip nammineq attaveqatigiittarfimmini, saqqummiuppai.

Aggustip aallaqqaataaniit nunanit taakkunannga niuerutigineqartartunut tamanut 25-it procentinik akitsuusiisoqarnissaa erserpoq.

Nunat allat aqqaneq marluk aamma akitsuutinik nalunaarutinik tigusaqassasut, Det Hvide Husimi tusagassiutinut attaveqartartoq, Karoline Leavitt, oqarpoq.

EU akitsuummik nalunaarummik nassiussivigineqassanngilaq, tamanna EU-mit Reutersimut paasissutissiissutigineqartoq.

Bruxellesimi marlunngornermi EU-p nunani ilaasortani aningaasarsiornermut naalakkersuisut ataatsimiikkiartorneranni, EU-Kommissionip Trumpip aqutsisui suleqatigalugit isumaqatigiinniarnernik ingerlatsisariaqartut, aningaasaqarnermut ministeri Stephanie Lose, kaammattuivoq.

– Pissutsinit sakkortusaasumik suli ajornartorsiuteqanngikkaluarluta, USA-mut attaveqarnissamut ammaffiginnissinnaasariaqarpugut. Aningaasaqarnikkut aaqqiissutissanik ujartuilluta ingerlaqqittariaqarpugut, isumaqarpungalu tamanna aamma siunissamut tunngatillugu ingerlatassaasoq, Stephanie Lose oqarpoq.

/ritzau/