Nakkutilliivimmi siuleriiaattuni uiverneq: Angalasut pakatseqqasut

Angalasussat pakatsisimaqisut amerlasuut, mittarfissuarmi sillimaniarnikkut nakkutilliivikkoornissamut sivisuumik utaqqisariaqartarsimanerminnik misigisatik, inuit attaveqaqatigiittarfiitigut saqqummiussuuppaat. Air Greenlandimi nassatanik tunniussisarfimmi siuleriiaat amerliartorneri ilutigalugit, angalasut arriitsunnguamik tattoqisaakkiartulertarput.

- Sillimaniarnikkut nakkutilliivitsinni sulisukinnerput maanna sulissutigaarput. Sulisunik nutaanik atorfinitsitsinissarput sulissutigaarput, tamannali pissutigalugu maanna utaqqinerusariaqartarput, Greenland Airportsimi attaveqaqatigiinnermut pisortaq Mikkel Bjarnø Lund oqarpoq.

Taanna naapertorlugu, pingaartumik ullaaralaakkut ilungersunarnerpaasarpoq siuleriiaattorpassuusarlutillu.

- Arlaannik amigaateqartoqartillugu suut tamarmik ingerlanneqaqqilernissaannut sivisunerusinnaasarpoq. Taamaammat ammarfissaraluatsinniit kingusinaarnerulaarsinnaasarpugut, taanna oqarpoq.

Mikkel Bjarnø Lundip “arlaannik” suut pineqarnersut itisiliinngilaq, oqaatigeqqippaali sulisussaaleqineq unammillernartuusoq misigitsik, tamannalu sulissutigineqartoq.

Siuleriiaani kingullersaq

Nuummi mittarfissuarmi taamaallaat siuleriiaatorpassuunngillat. Aamma sillimaniarnikkut nakkutilliivimmi sulisussanik nutaanik atorfinitsitsiniarneq sivitsorpoq. Mikkel Bjarnø Lund naapertorlugu, mittarfissuarmi nakkutilliiimmi sulilertoqassagaangat oqartussaasunit arlalinnit akuerineqarnissaat piumasaqaataasarpoq. 

- Peqqissaartumik ilinniartinneqarnerup sungiusarneqarnerullu saniatigut, atorfinitsitsinermut tunngatillugu allaffissorluni ingerlatsinermi suliat pingaaruteqarputtaaq pisariullunili. Sulisunik amerlanernik atorfinitsitsissagutta oqartussaasut allat pinngitsoorsinnaanngilagut, taanna oqarpoq.

Sillimaniarnikkut nakkutilliivimmi pingaartumik ullaakkut siuleriiaappassuanngorsinnaasarput. Angasut pakatsimasut arlallit, akunnerni arlalissuarni utaqqisimanertik aamma sillimaniarnikkut nakkutilliiviup matoqqanera pillugit oqaluttuarniarlutik KNR-imut saaffiginnittarsimapput.  Assi © : Rasmus Balle Hansen/KNR

Allaffissorluni ingerlatsinermi tulleriiaarinerit qanoq sivisutigisumik Greenland Airportsip namminneq utaqqissanerlugit akisinnaanngilaa. Taamaattumik pingaartumik ullaaralaakkut angalasussat, naligiissumik sukkassusilimmik sillimaniarnikkut nakkutilliivikkoortaleqqinnissaat qaquguussanersoq nalunarallarpoq.

- Pisoq pillugu aaqqiissuteqarniarluta tamaviaarlutalu aalajangiusimasumillu sulivugut. Sapinngisarput tamaat iliuuseqarniarsarivugut. Nuup mittarfissuaniit angalanermik eqaannerusumik misigisaqarnissamut ungasinngitsumi qulakkeerisinnaanngornissarput neriuutigaarput. Pisoq pillugu ajuusaarpugut, taanna erseqqissaavoq.

Pisut tulleriiaatiinnalerneri

Nuummi nunanut allanut mittarfissuaq siorna novembarip 28-ani ammarmalli aallartinniarnermi ajornartorsiutit arlaliupput. Kisianni ajornartorsiutitaqanngitsumik mittarfimmik nutaamik ammaasinnaanngilagut, Mikkel Bjarnø Lund nassuiaavoq.

- Mittarfeqarfiuvugut nutaajusoq, nutaanik atortorissarutilik suleriaasilillu. Sulisullu nutaat sulilernerat ajornartorsiutitaqalersimammat naammattuuinerlunnerinnaavoq. Sillimaniarnerli qasukkarsinnaanngilarput, taanna oqarpoq.

Timmisartuussinissaq ataaseq taamaatiinnarneqartoq sinnerilu kinguaattoortut. – sulisussanik amigaateqarneq pissutaalluni kingusinaarluta aallartikkaangatta, timmisartunut sunniuteqartarpoq, pingaartumik ullaakkut timmisartuussinernut, Nuummi mittarfissuarmi kinguaattuulaarnermik kinguneqarsinnaasarpoq. Tamanna utoqqatsissutigingaarparput. Sapinngisarput tamaat iliorugut, Mikkel Bjarnø Lund oqarpoq.  Assi © : Rasmus Balle Hansen/KNR

Naak Greenland Airports sulisussaaleqigaluarluni amerlanerusunik suliaqarnissaminut tunuarsimaanngilaq. USA nunattalu akornanni timmisartuussinermi aqqutit nutaat kiisalu Københavnimiit Nuummut SAS-imik nutaamik aqqummik qaammat kingulleq ammaavoq. Kisianni suliassanut taakkununnga nutaanut  kivitsinissamut sulisukippallaarnera Mikkel Bjarnø Lundip akerlilerpaa. 

- Taamatut isumaqanngilanga. Suleqativut tunniusimallutillu pimoorussillutik sulipput, mittarfeqarfinnilu ajunngilluinnartumik suliniuteqartuupput. Uteqqippara immikkoortuni arlalinni naammattuuinerlunnerinnaavoq immikkut ittumik pisoqarneranik pilersitsisuusumik, taanna oqarpoq.