Mette Frederiksen: Europa ajornartorsiutinut nukittunerulissaaq

Danmarkip EU-mi juulip aallaqqaataani siulittaasunngornerata kingorna, Mette Frederiksen (S) EU-p inatsisartuini Strasbourgimi siulittaasutut siullermeerluni ullumi oqalugiarpoq.

Mette Frederiksenip ”Et stærkt Europa i en verden i forandring”-imik qulequtaqartumi, qallunaat qaammatini arfinilinni tulliuttuni siulitaasuunissaanut pilersaarutai pingaarnerit saqqummiuppai.

Isumannaallisaaneq siulliullugu 

Taassuma Europa ajornartorsiortorujussuusoq ataatsimoorlunilu taamaallaat aaqqiivigineqarsinnaasoq, aallaqqaataaniilli aalajangersimarpaluttumik nipeqarluni uparuarpaa.

- Europa sutigut tamatigut illersussavarput, taamattumik qallunaat siulersuisoqatigiit – soorunami – Europa kangianiit sioorasaarneqarneranut imminut illersorsinnaanngortinniarlugu, Europami sakkussiornissaq pingaarnertut anguniassavaa, Mette Frederiksen Ruslandimut innersuussilluni oqarpoq.

Ministeriuneq naapertorlugu, EU kingusinnerpaamik 2030-mi imminut illersorsinnaasunngussaaq, Ukrainelu pisariaqartitsineq naapertorlugu tapersersorneqarsinnaajuaannassaaq.

Nunamiit nunamut allamut nussortut aamma silaannaap pissusaa oqaluuserineqartut

Europami isumannaallisaaneq ilaatigut inuit nutsernerannik tunngaveqartoq Mette Frederiksenip oqaatigaa. EU-p nunani ilaasortat kissaateqarfigai isorliunerusuni killeqarfiit nukittorsarneqassasut, kiisalu qimaasutut qinnuteqartut itigartinneqarsimasut nunagisaminnut angerlartinneqartalissasut.

– Europami innuttaasunut isumannaallisaaneq aamma inuit nutsernerannik tunngaveqarpoq. Tamanna Europamut unammillernarpoq, inuillu inuunerannut aammalu inuiaqatigiinni ataqatigiinnermut sunniuteqartarluni, Mette Frederiksen oqarpoq.

Silaannaap pissusaa aamma pingaaruteqartuuvoq. Europa allanngoriartornermi avatangiisinut tunngatillugu kinguariartulersimasoq, Mette Frederiksenip oqaatigaa. Taamaattumik danskit EU-mi siulittaasuuneranni silaannaap pissusaa pingaarnerpaamik sammineqassaaq.

– Tamatta suleqatigiittariaqarpugut, neriuutigaaralu qaammatit arfinillit tulliuttut suleqatigiilluarfiussasut, Mette Frederiksen oqarpoq naggasiivorlu: ”Europa nukittunerusumik ataatsimoorluta pilersinniarlugu ingerlatseqatigiitta!” 

Aammalu Danmarkip kunngeqarfiata tapersersuineranut qujalluni – “Kalaallit Nunaat ilannguppaa”

Qujassuteqarnermi Kalaallit Nunaata tapersersuinera eqqaaneqarpoq, kisianni allatigut taaneqanngilaq.