Ullorissap anaata itersaliarsuanik ammalortumik nunatsinni nassaartoqartoq
Ilisimatusartut arlallit ilaatigut Københavnimi Statens Naturhistoriske Museumimeersut sermersuup naqqata ilusaa ukiut pingasut matuma siorna ilisimatusarfigaat.
Nunanit tamalaanit ilisimatusartut naalagaaffiup pinngortitamik ilisimalikkanik katersugaasivimmi, tassa Københavnimi Statens Naturhistoriske Museumimi, Center for GeoGenenetikimit siuttuuffigineqarlutik Kalaallit Nunaanni Sermersuup nunataata ilusaa nutaaq qanimut ilisimatusarfigaat.
Ilisimatusarnerminni Sermersuup nunatta avannaani killingani, sermini iigartartumi Hiawathami itersarujussuaq malugaat.
Itersaqalerneranulli pissutaasup paasiniarnerani paasissutissat naammattut ukiuni pingasuni pissarsiariniarneqarput.
Allaaserisaq ataani nanginneqarpoq.
Tyskit ilisimatusarnermi timmisartuata Hiawathami sermeq iigartartoq sermerlu maajimi 2016-imi qulaallugu raadarimik sakkortuumik assiliortoriartorpaa
AAMMA ATUARUK Silaannaap ujaraa Qaanaameersoq allamut nuukkallaleraat
- Assilisallu nunap ilusaani qeqqani portunersaqartumik ammalortoqartoq killimigut portulimanertaqartumik.
Statens Naturhistoriske Museumimi Center for CeoGenetikimi professori, Kurt Kjær oqarpoq.
Parisimit anginerusoq
Ullorissap anaata itersaliarsua ammalortoq illuaniit illuanut 31 kilometerinik annertussuseqarpoq, tassa Parisimit aanertunerulluni, taamaalillunilu itersani nunarsuarmi nassaarineqarsimasuni 25-ini anginerpaanut ilaalluni.
Ullorissap anaata kilometerisut angitigisup nunatta avannaanut nakkarneratigut itersaliaq pinngorsimassasoq, ilisimatuut isumaqarput, itersaliarlu sermip 1 kilometerisut issutigisup ataani taamanerniilli toqqoqqalersimassalluni.
Ullorissap anaa ukiunit 3 millioninit ungasinnerunngitsumit aammali ukiut 12.000-init ungasinnerunngitsumit nakkarsimassangatinneqartoq, Kurt Kjær nassuiaavoq. Erseqqinnerusumilli nassuiarniarlugu ima oqarpoq:
- Piffissaq eqqorluarnerussagaanni taava sermersuaqarneranit kingullermeersuusoq, tassa ukiut kingulliit 100.000-it missaanneersuusoq oqaatigineqarsinnaavoq, ilisimatooq oqarpoq.
AAMMA ATUARUK Ullorissap anaa Maniitsup eqqaanut nakkarsimavoq
Ullorissat anaatangisuut silap pissusianut nunarsuarmilu uumassutsimut kingunerluuteqangaatsiartartut ilisimaneqarpoq. Taamaammat nakkartup suut kingunerisimanerai ilisimatuut maanna misissornialeraat, Kurt Kjær oqarpoq.
Kurt Kjærip oqarnera naapertorlugu itersaliaq paasilluarniaraanni Sermersuarmi 900 meterimut qillerinissa itersaliamilu 100 meterinik qillerinissaq pisariaqarpoq.
