Issittumi Siunnersuisoqatigiit ataatsimiititaliaata Ilulissani kommunalbestyrelsimi ilaasortat ataatsimeeqatigigaat

Avannaata Kommuniani kommunalbestyrelsimi ilaasortat atorfilittallu Issittumi suleqatigiinneq nukittorsarniarlugu Issittumi Siunnersuisoqatigiit ataanni ataatsimiititaliami aallartitat ataatsimeeqatigaat.

Avannaata Kommunia nittartakkamini taama allappoq.

Ataatsimeeqatigiinnermi najukkami pissutsit, periarfissat issittumilu ilungersunartut pillugit misilittakkanik avitseqatigiittoqarpoq.

- Pulaarneranni nukittorsarneqartoq tassaavoq issittumiilluta atukkatta assigiinngilluinnarnerisa ersarissaaviginerisigut paasinnittoqarnerulernissaa, Avannaata Kommuniani borgmesteri Lars Erik Gabrielsen (S) KNR-imut allakkatigut akissuteqarluni allappoq.

Illoqarfiullu ineriartortinnissaanut periarfissat assigiinngitsut soorlu aqqusinniorneq, anartarfeqarnikkut aaqqissuussaanerit allaanerusut ikuallaaveqarnerlu saqqummiunneqarput.

- Eqqartukkagut siammasipput, kommunerput pillugu ingerlatsivik saqqummiivoq, ineriartornermut periarfissat aammali kommune isorartooq annertuumik assigiinngissuteqartoq unammilligassallu imaannaanngitsut nassuiaatigaagut, Lars Erik Gabrielsen allappoq nangillunilu:

- Ikuallaaviit pisariaqartippavut, mikisunnguit anginngitsut piumavagut naalakkersuisut kissaatigaat Sisimiuni Nuummilu ikuallaaviit assinginik sananngikkutta akuerineqarsinnaanngitsut, taanna oqarpoq.

Ataatsimiititaliami ilaasortat ikiuukkusuttut

Ataatsimeeqataasut ataatsimiinnermi saqqummiunneqartut pillugit ikiuukkusullutik qanorlu ingerlariaqqissinnaanerannik siunnersuuteqassallutik aamma oqaatigaat.

Avannaata Kommuniani kommunalbestyrelsimi ilaasortat atorfilittallu Issittumi Siunnersuisoqatigiit ataanni ataatsimiititaliamik, Issittumi nunanit ilaasortanit ilaasortalik ataatsimeeqatigineranit, taakkulu illoqarfiit ineriartortinnissaannut ikiuukkusunnerannit pissarsiaqarluarlutik aamma oqaatigaat.

- Misigisimavugut pissarsilluarluta toqqaannartumik oqartoqarmat: Paasissutissanik nassikkisinnga taakku EU-mut apuutissavakka. Angusaqarfigisinnaaneri isumalluarnarmata pissarsiaqarluartutut oqaatigisariaqarpoq, Lars Erik Gabrielsen allappoq.

Nunarput Issittumi Siunnersuisoqatigiinni 2025-miit 2027-p tungaanut siulittaasuuvoq. Tassanilu Nunanut allanut, Inuussutissarsiornermut Aatsitassanullu Naalakkersuisoq Múte B. Egede (IA) siulittaasuuvoq.