Ilisimatusartut: Silassorissuusiat suliaqartitat Canadami oqartussaasunut hackeriniarnerat iluatsinngitsoq

Silassorissuusiutit suliaqartitat Canadami naalakkersuisut nittartagaannut paasissutissanik tamanut ammasunik pissarsiniarsarisimapput.

Silassorissuusiat pillugit ilisimatusartut kattuffiat Transluce, allaaserinnittarfikkut allaaserisami taama paasissutissiivoq.

Canadap atuagaateqarfia toqqorsivialu, Library Archives Canada, pineqarpoq.

Suliaqartitat nittartagaq maajip 28-anni juunillu qulingiluaani iserfiginiaraluarpaat, kattuffik allappoq. 899-eriarlutik qarasaasiatigut iserniarsaripput.

Qarasaasiatigut iserniarsarinerit 899-it akornanni, 13-it qarasaasiakkut hackerilluni saassussinerusut, Transluce allappoq.

Aammattaaq silassorissuusiutit suliaqartitat, Canadami aappariit katissimasut 1905-imiit 1911-mut avittut pillugit paasissutissanik pissarsiniarsarisimapput.

- Taamaaliorneq OpenAI-meersuunissaat qulakkiinngilarput, taamaaliornermili periaatsit atorneqartut siusinnerusukkut misissuinitsinni OpenAI-ip periuusaanut assingusunut naapertuupput, Transluce allappoq.

Chatbot ChatGPT OpenAI-mit pilersinneqarpoq.

'Iliuutsit aqunneqarsinnaanngitsut'

Silassorissuusiat suliaqartitat Amerikamiut ilinniartitaanermut ministereqarfiup innuttaasut pisinnaatitaaffiinut paasissutissanut toqqorsiviat, Civil Rights Data Collection aamma iserfigisimavaat. 200.000-eriarluni juunip 17-ianni iserniarsarisoqarpoq. 

Translucelli allanneratut, ’qarasaasiatigut saassussiniarnerit ineriartortinneqanngitsut iluatsinngitsullu’ pineqarput. 

- Misiliinerit iluatsinngitsut iliuuseqarnernut allanik killormut ingerlalernernut attuumassuteqarput, tassani suliaqartitat periusissanik sakkortuunik arlalinnik atuisimapput, qarasaasiatigut saassussinerunngitsumik, USA-mi oqartussat nittartagaannik misissuisimallutik.

Translucep nittartakkat præsidentip illorsuanit, illersornissamut ministereqarfimmit, inatsiseqarnermut ministereqarfimmit, niuernermut ministereqarfimmit, peqqinnissaqarfik CDC aningaasaqarnikkullu nakkutilliivimmit pigineqartut iserfiginiarneqarsimanerat eqqaavaa. 

Californiami, Marylandimi, Illinoisimi, Texasimi New Yorkimilu oqartussat iserfiginiarneqarsimapput.  

- Suliaqartitat paasissutissanut, tamanit takuneqarsinnaanngitsunut, iserfiginnissimanersut suli takussutissarsinngilagut, Transluce allappoq. 

Pisoqartajaarnerit

Translucep kikkut Amerikamiut oqartussaqarfiinut taamaaliorsimanersut oqaatiginngilaa. 

Suliffeqarfiup Canadamiut naalakkersuisuisa saassussineq ataasinngornermi maluginiarsimagaat paasissutissiissutigaa. 

Canadap qarasaasiatigut isumannaallisaaviata silassorissuusiamik suliaqartoqarsinnaaneranik nalunaarutit ilisimallugit marlunngornermi oqaatigaa. 

- Naalakkersuisut qarasaasiaasa ajortinneqarsimanerinik maannakkut takussutissaqanngilaq. 

Qaammatini kingullerni pisoqallattaarpoq, tassani silassorissuusiat suliaqartitat suliffeqarfiit oqartussallu qarasaasiaat iserfigeriaqattaarpaat saassunniarsaralugillu. 

Suliaqartitat amerlasuut ChatGPT-p pilersitsisuanut OpenAI-mut attuumassuteqarput. 

RITZAU