Arnat assammik arsartartut nunanut allanut unammisartui VM-imut anngunniunnissamut piareersartut
Arnat assammik arsarlutik nunanut allanut unammisartui nunatsinneersut, assammik arsarluni nunarsuarmi aappaagu pissartanngorniunnissamut anngunniunnermi unammeqataanissaminnut atatillugu, Frankrigimi illoqarfiit pingaarnersaannut, Parisiliassapput.
Kalaallit Assammik Arsartartut (TAAK), Kalaallit Nunaanni assammik arsartartut kattuffiat tusagassiuutinut nalunaarummi taama allappoq.
Taamaattumik arnat assammik arsarlutik nunanut allanut unammisartuisa sungiusaasuata Jakob Larsenip, sungiusaasullu ikiortaata Kim O. Petersenip, assammik arsartartut 17-it, nunarput sinnerlugu sungiusaatigalugu unamminernut pingasunut peqataasussat toqqarpaat.
Taakkua Marokkop, USA-p Frankrigillu nunanut allanut unammisartui 19-it ataallugit ukiullit, ullut pingasut ingerlaneranni unammissavaat.
- Unammisartut amerlasuut maannakkut takutitsilluaqaat, taamaattumik arsartunut tamanut qaffassaaqataallutik. Avataani arsartussat 15-it måliniittussallu marluk Parisimut nassassavagut.
- Unamminissat isikkua takullugu, unamminerit pingasut piffimmi sivikitsumi, pingaaruteqarpoq hold-itut ataatsimoorsinnaalluta arsartussallu tamarmik piareeqqanissaat, Jakob Larsen tusagassiuutinut nalunaarummi oqarpoq.
Ullut tamaasa ilungersorneq
Arsartussat marluk, tassaasut Christina V. Lange aamma Karla de Kam ilaalertut, tusagassiuutinut nalunaarummi allaqqavoq.
Najaaja L. Heilmannili ajoraluartumik seeqqumigut ajoqusersimanini pissutigalugu arsaqataassanngilaq.
- Arsartut tamavimmik sukataarnissaat pimoorunneqartussaavoq, - maannakkumut toqqarneqartuugaluaraanni imaluunniit toqqarneqanngitsoorluni. Toqqarneqarneq sinnassaataassanngilaq, suliassat juullip tungaanut sukataarfiussapput, Jakob Larsen oqarpoq.
Nunarput VM-imut anngunniunnermi ajugaareerluni, Norgemi Danmarkimilu VM-imut 2023-mi peqataammat maani nuannattoqaqaaq.
Timersoqatigiiffilli aningaasassaaleqineq peqqutigalugu VM-imut ajoraluartumik anngunniuteqataasinnaajunnaarluni siorna nalunaarmat pakatsisoqarpoq.
Nunarput assammik arsarnermi VM-imut peqataareerpoq. Arnat nunanut allanut unammisartut VM-imut 2001-imi 2023-milu peqataapput. Angutillu nunanut allanut unammisartut 2001-imi, 2003-mi 2007-milu peqataallutik.
