Politiit ullormut nalunaarutaat: Angummik ujaasineq inuillu pingasut SAR-imik ujaarineqareerlutik ajunngitsut nanineqartut

Kalaallit Nunaanni Politiit Issittumilu Sakkutooqarfiup inuit pingasut umiatsiarlutik tammaaneqartut pingasunngormalli ujaaraat. Tamarmillu ajunngitsut maanna nassaarineqarput. Niviarsiaraq angummit pingasunngormat saassunneqarpoq politiillu takunnissimasinnaasunik ujartuipput.

Allattoq Brian Jensen

oktobarip 01-at 2026 09:57

Nutserisoq Brian Jensen, Ivalu Thorleifsen

Kalaallit Nunaanni Politiit niviarsiaraq angummit Nuummi Piitaq Lundip Aqqutaani Quassunnguup eqqaani saassunneqarsimasoq pillugu pingasunngormat nal. 21.15 nalunaarfigineqarput.

- Angutip niviarsiaraq imminut toqoqqusimavaa toqunnissaanillu sioorasaarlugu, sillimasut pisortaat Hans Peter Berthelsen oqarpoq:

- Taassuma kingorna angutip ilisimaneqanngitsup niviarsiaqqap talia tiguaa, niviarsiaqqallu angut kiisimavaa qimaallunilu.

Kalaallit Nunaanni Politiit takunnittoqarsimappat tusaasaqartoqarsimappalluunniit nalunaaqqusipput. Angut 175 centimeterit missaannik angissuseqarpoq, nalinginnaasumik timilik naatsunillu kajortunik seqiniusaanillu nuulinnik nujaqarpoq.

Qasertumik kiinnani assersimavaa, qernertumik kavaajaqarpoq, aaqqatai nuersagaapput adidasinillu kameqarluni.

- Takunnissimasinnaasunik tusaasaqarsimasinnaasunilluunniit imaluunniit pisumut ilisimasaqarsinnaasunik ujartuivugut, Hans Peter Berthelsen oqarpoq.

Inuit pingasut ujaarineqariarlutik nassaarineqartut

Kalaallit Nunaanni Politiit Issittumi Sakkutooqarfiullu inuit pingasut ujaarineqareerlutik nanineqartut ajunngitsullu politiit sillimasuisa pisortaata oqaluttuara.

Politiit Issittumi Sakkutooqarfiullu inuit pingasut Saqqamiit Qaarsunut ippassaani marlunngornermi aallartut kingorna ujaarineqalertut ajunngitsut ippassaq ullup-qeqqata missaani nanineqartut, sillimasut pisortaata Aqqaluk Petersenip oqaluttuaraa:

-Tassa ippassaq ullup-qeqqata missaani nassaarineqarput ajunngitsut. Qaarsunullu apuunneqarsimallutik, sillimasut pisortaat oqarpoq.

Aamma atuarukInuit pingasut maqaasineqartut – SAR-imik suliaqarneq aallartinneqartoq

Inuit pingasut Saqqamiit Qaarsunukartillutik ujaarineqaleraluartut timmisartumit Challengerimit takuneqarsimasut, Aqqaluk Petersenip ilanngullugu oqaluttuaraa:

-Issittumi Sakkutooqarfiup timmisartuata Challengerip qulaaqqulluni takugamigit sumiinnersut, taava politiit ujaasisut umiatsiamik aavaat, sillimasut pisortaat Aqqaluk Petersen inuit pingasut ujaarineqaleraluartut pillugit taama oqaluttuarpoq.

Ujaarineqaleraluartut motooriminnik ajutoorsimasut sillimasut pisortaata ilanngullugu oqaluttuaraa.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.