Ukrainemi eqqisseqatigiittoqarnissaa pillugu isumaqatigiinniarnerit nutaat Ukrainep aallartikkai
Ukrainep isumaqatigiinniartitaasa siuttuat Rustem Umerov taama ilisimatitsivoq. Nutaarsiassaqartitsivik Reuters taama allappoq.
Ukrainemi sorsunnerup soraarnissaa anguniarlugu Ukraine, Rusland USA-lu isumaqatigiinniassasut naatsorsuutigineqarpoq, sorsunnerlu soraarpat Ukrainep isumannaatsuunissaa aamma qulakkeerniarneqarluni.
USA-p Abu Dhabimi isumaqatigiinniarnernut sinniisui tassaapput USA-p immikkut aallartitai Steve Witkoff Jared Kushnerilu.
Abu Dhabimi isumaqatigiinniarnissat sioqqullugit Ukrainep sinniisuisa Europap nunallu killiit illersoqatigiiffiata NATO-p sinniisui, USA-llu sinniisui Witkoff Kushnerilu ataatsimeeqatigaat.
Illuatungeriit inissisimaffitsik tassani tulluarsarniarsaraat. Rustem Umerov paasissutissiisarfikkut Telegramikkut taama oqaluttuarpoq.
- Tuluit Nunaata, Frankrigip, Tysklandip, Italiap, NATO-p EU-Kommissionillu sinniisui, USA-llu immikkut aallartitai Steve Witkoff Jared Kushnerilu aallarniutigalugu ataatsimeeqatigineqarput.
- Inissisimaffigut tulluarsarniarsaraagut, isumaqatigiinniarnissanut alloriarfissatta tullii isumaqatigiinniutigalugit, Rustem Umerov ataatsimiinnissaq sioqqullugu oqarpoq.
Isumannaatsuunissamik qulakkeerinninnerit pioreersut ilaneqassasut
Ukrainep, Europap NATO-llu sinniisuisa ataatsimeeqatigineqarneranni suut oqaluuserineqarsimanersut Steve Witkoffip kingorna saqqummiuppai.
Ukrainemi sorsunneq soraarpat Ukrainep isumannaatsuunissaanut qulakkeerinnissutit pioreersut ilaartorneqarnissaat oqaluuserineqartut, Steve Witkoffip inoqatinut attaveqartarfikkut X-ikkut allaaseraa.
Volodymyr Zelenskyj Abu Dhabimi isumaqatigiinniartoqarnerata nalaani Danmarkimut tikeraarpoq.
Nunani Avannarlerni naalakkersuinikkut siuttut tassani oqaloqatigissagai, Danmarkimi ministeriunerup allattoqarfiata nalunaarutigaa.