'Tusass taamaaginnarpoq. Immikkoortoq nutaaq': Tusassip data akimik allannguinani tallimariaatinngortikkaa
Tusassimit mobilikkut atuisuuffeqaruit akiliutigisartakkannut dataqarnerulersutit allagarseqqammersimassaatit.
Tamanna Tusassip mobilikkut atuisuuffinnik nutaanik, atuisartunut akimik allannguinani dataqarnerungaatsialersitsinermik saqqummersitsineranik pissuteqarpoq.
Tusass tusagassiuutinut nalunaarummi allappoq.
Toqqagassat nutaat saqqummiunneqartut
Atuisuuffik atorluarneqarnerpaaq 20 GB-imit 100 GB-inngortinneqarpoq – taannalu qaammammut suli 499 koruuneqassalluni.
Tamatuma saniatigut atuisartunut nioqqutissaq akisunerpaaq 699 koruunimit 499 koruunimut akikillineqarpoq.
- Killormut ingerlaarpugut, Tusassip nioqqutinut pisortaa, Runo Fencker-Noahsen oqarpoq, taassumalu inuuniarnermi aningaasartuutit amerliartuinnarnerat aalajangernerminnut pissutaanerarlugu.
Atuisartunut toqqagassatut periarfissat pingasuupput: 1 GB 129 koruuneqartoq, 10 GB 349 koruuneqartoq aamma 100 GB tassunga 5G ilanngullugu 499 koruuneqartoq.
'Nunani allani Tusass' toqqagassani nutaani annerpaavoq, taannalu 20 GB-imut killeqassasoq, Tusass tusagassiuutinut nalunaarummi allappoq.
Inuinnaat atuisartut kisimik pineqanngitsut
Meeqqanut suliffeqarfinniillu atuisartut aamma dataqarnerulerput.
Meeqqanut atuisuuffik anneq 149 koruuneqartoq 10 GB-inngortinneqarpoq. Tamatuma saniatigut 1 GB 89 koruuneqartoq aamma neqeroorutaalluni.
Suliffeqarfinni atuisuuffinnut akigititat datallu aamma nutaanngortinneqarput, atuisuuffik anneq akimik allannguiffiunani 200 GB-inngortinneqarpoq.
Tamatuma saniatigut 3 GB 199 koruunilik, 100 GB tassunga 5G aamma Nunani allani Tusass 20 GB ilanngullugit kiisalu 200 GB tassunga 5G aamma Nunani allani Tusass 20 GB ilanngullugit 699 koruunilik neqeroorutigineqarput.
Tusassip akit nutaat nunarput tamakkerlugu atuuttut Tusassillu internetimut atuisuuffinnut allannguutit ukiup ingerlanerani kingusinnerusukkut saqqummiukkumaarai paasissutissiissutigai.
