Trumpip nunarput sermiuneraraa aqutsinerluffiusoq Natolu isornartorsiorlugu

Kalaallit Nunaat sermiminersuuvoq aqutsinerluffiusoq.

Taama oqarpoq USA-p præsidentia Donald Trump, taassumalu nammineq inoqatinut attaveqaatimini Truth Socialimi Nato sakkortuumik isornartorsiorpaa.

- Nato pisariaqartitsinitsinni ikiuinngilaq, pisariaqartitseqqileruttalu aamma ikiuunnavianngilaq.

- Kalaallit Nunaat eqqaamajuk, sermiminersuaq aqutsinerluffiusoq!, Trump allappoq.

Præsidentip Kalaallit Nunaat allaaserisamini sooq eqqaanerlugu oqaatigerusunngilaa.

Trumpip Natop qullersaa, Mark Rutte, USA-p illoqarfiisa pingaarnersaanni Washington D.C.-mi, USA-p Iranimut sakkulersorunnaarallarnerata kingorna, pingasunngornermi ataatsimeeqatigaa.

Rutte tusagassiorfimmut CNN-imut ataatsimiinnerup kingorna oqarpoq, Natomi nunat ilaat Kangiani Qiterlermi pissutsinut tunngatillugu kukkusimasut.

Europamiut naaggaartut

Trumpip Iran pillugu tusagassiortunik katersortitsinermini Kalaallit Nunaat tiguarniarlugu kissaatini ataasinngornermi unnukkut uteqqippaa.

Aamma tassani Nato piviusumiit nukittunerunngitsutut isornartorsiorpaa - tassa peqatigiiffittut qallikkut qununaqisutut, ilumoortumilli taama ulorianartiginngitsigisutut.

USA-p Israelillu Iran februaarip ulluisa 28-anni saassummassuk Trumpip USA-p Europami ilii ikiuuteqqullugit kajumissaarpai.

Hormuzip kangerluata pingaaruteqarluinnartumik ammatinneqarnissaani Europa iligiit ikiuutinngippata Natomut ajortuusoq, aamma oqarpoq.

Tamannali Natop suliassarinngimmagu Trumpillu taassumalu naalakkersuisuisa aaqqiagiinnginnerup suna siunertarineraa erseqqissumik oqaatigisimanngimmassuk Europamiut naaggaarput. Pilersaarusiornermullu Natomik peqataatitsinngillat.

Sakkortusiartuinnartoq

Trumpip  Kalaallit Nunaat ukiuni arlalinni soqutigaa. Amerikamiut Kalaallit Nunaannik tiguaanissaat 2019-imili eqqarsaatigereerpaa.

Tamatuma kingorna pissutsit taakku akuttunngitsumik sammineqartarput, USA-lli Kalaallit Nunaannik Danmarkimillu akerlerinninnera ukioq manna januaarimi sakkortusiartuinnarpoq.

Trumpip sakkutuut atorsinnaallugit aallaqqaammut itigartitsissutiginngilaa. Tamanna Europami nunarsuarmilu tamarmi uivertitsivoq. Schweizimili aningaasaqarnermut tunngasunik kingusinnerusukkut ataatsimeersuartoqarnerani sakkutuulersorniarnani oqarpoq.

/ritzau/