Tusagassiuut: Trumpimik tapersersuisoq nunatsinni piginneqatigiiffinni piginneqataassuteqartoq
USA-p præsidentianik Donald Trumpimik nunatsinnik soqutiginnilersitsisutut taaneqartoq Ronald Lauder nunatsinni piginneqatigiiffinni marlunni piginneqataassutinik pisisimasoq, Politiken allappoq.
Piginneqatigiiffiit Greenland Water Bank taavalu Greenland Investment Group matumani pineqarput.
Mianersornissamullu pissutissaqartoq, Politikenip immikkut ilisimasallit marluk oqaloqatigisai isumaqarput.
Illersornissamik ilisimatusarfiup periusissiornermut sorsunnernillu ilisimatusarnermut immikkoortuani lektori Marc Jakobsen tusagassiuummut ima oqarpoq.
- Piffissamut ungasinnerusumut isigaluni aningaasaliisoq nalunanngilaq. Taakku suliniutit marluk ilisimasaqarfiginngilakka, kisianni taassuma aningaasaliissutai aningaasaataanik ilaangaataavallaarnavianngillat. Aningaasaliinera Trumpimut qaninniarneruvoq, Kalaallit Nunaannilu inuiaqatigiinni qullasinnerpaatut inissisimasunut attaveqarfissarsiornermi iliuusiulluni, lektori Politikenimut oqarpoq.
Trump nunatsinnik pisiumalluni 2019-imi oqarpoq.
Præsidentitullu aappassaanik qinerneqarami nunatta USA-mit pigineqarnissaanik kissaateqarluni oqaqqippoq.
Donald Trump Juniorip Nuuk 'takornariatut' ataataata præsidentitut suli ivertinneqannginnerani tikeraarpaa.
USA-p nunarput sillimaniarnermut pigisariaqaraa Donald Trump arlaleriarluni oqartareerpoq.
Sakkutuulersornikkut nunatsinni aqutsilernissani mattunniarnagu oqaatigisareerpaa.
