Trumpimik tapersersuisoq nuimasoq, USA-mi oqallitsitsisoqarnerani aallaaneqarluni toqutaavoq
Konservativeq politikkikkut suliniuteqartartoq Charlie Kirk, USA-mi naalagaaffiup Utahip ilaani oqallitsitsinerup nalaani aallaaneqarluni toqutaavoq.
USA-p præsidentia, Donald Trump, attaveqatigiittarfimmini Truth Socialimi taama allappoq.
- Tamanit asaneqarlunilu nuannarineqarpoq - pingaartumik uannit - maannalu akornatsinniikkunnaarpoq, taanna allappoq.
Charlie Kirk eqqaaniarlugu amerikamiut erfalasui tamarmik, erfalasulerfinni qiteqquteqqanissaat tamannalu sapaammi unnukkut nalunaqutaq arferngup tungaanut pinissaa, Trumpip naalakkiutigivaa.
Kirk, universitetimi pisoqartitsinerup nalaani qungatsimigut aallaatissimasoq, Utah Valley Universitymiit oqaaseqartartoq Reuters naapertorlugu oqarpoq.
Aallaannissimasutut pasisamik suli tigusarinnittoqanngitsoq, ilanngullugu oqaatigineqarpoq.
Utahmi guvernørip, Spencer Coxip, Trumpi attaveqaqatigisimanerarlugu, inoqatinut attaveqaatini X-mi allappoq.
- FBI Utahmilu politiit suleqatigalugit, alianartumut tamatumunnga akisussaasoq eqqartuussiviliaanneqarnissaa isumagissavarput, taanna allappoq.
Trump Jr. peqatigalugu nunatsinnut tikeraartoq
Takunnittuusoq Justin Hickens NBC News-imiit oqaloqatigineqarpoq, taannalu oqarpoq Kirk aallaaneqarmat eqqaaniissimalluni.
- Nipitoqisumik sakkortuumillu aallaarpallattoqarnera tusaavarput. Charliep timaa aattorujussuusoq takuara. Timaa tunumooriarluni nukillaartoq takuara. Kikkut tamarmik nunamut imminnut milorujuttutut ilillutik pallorput, Hickens oqarpoq.
Aallaasersortoqareernerata kinguninngua pasisamik tigusarinnittoqarsimasoq, Utah Valley Universitymiit nalunaarutigineqarpoq.
Takunnittut oqaluttuarnerat internetikkullu immiussat naapertorlugit angut utoqqaq politiinit aallarunneqarsimavoq.
Tamatuma kingorna New York Times-imi allassimavoq inuk tigusarineqaraluartoq aallaasersortuusimanngitsoq.
Charlie Kirk 31-nik ukiulik konservativit isumaannik siammarterisuusimavoq, katisimasoq marlunnillu qitornalik. USA-mi Turning Point, inuusuttunut konservativinut aningaasarsiutaanngitsumik kattuffiusoq, tunngavileeqataaffigaa.
Aamma Donald Trumpimik politikkikkut tapersersuisutut ilisimaneqarpoq, januaarimilu Donald Trump jr. peqatigalugu nunatsinnut tikeraarpoq.
Kirk aamma 2020-mi qinersinermi Donald Trumpip Joe Bidenimut ajorsarneranut qinersinermi peqquserluttoqarneranik peqquteqarsorinnillutik tusagassiuutitigut saqqummertartut ilagisimavaat.
Kirk podcastimi nuannarineqarluartumik „The Charlie Kirk Show“-imik aallakaatitsisuusimavoq, inoqatinullu attaveqaatini, ilaatigut Instagramimi, 7 millioningajanniit malinnaaffigineqarluni.
/ritzau/
