Royal Greenland nutaamik pisortartaartussanngortoq

Toke Binzer Royal Greenlandimi pisortaaninngussaaq.

Namminersorlutik Oqartussat ingerlatseqatigiiffiutaat tusagassiuutinut nalunaarummi taama allappoq. Tassalu Royal Greenland Susanne Arfeldt Rajamandip soraarsitaaneranit ukioq affaq qaangiuttoq nutaamik pisortartaartussanngorpoq. Siulersuisunut ilaasortaq Preben Sunke taamanili pisortatut atorfeqarallarpoq.

Toke Binzer decembarip aallaqqaataani atorfittaamini sulilissaaq.

- Royal Greenlandip Toke Binzeri nuannaarutigingaarlugu tikilluaqquvaa. Tokep piginnaasatigut nutaaliornikkullu aqutseriaaseqarsinnaanini uppernarsarsimavaa. Siulersuisullu qilanaarput, misilittagaqqortunera aammalu aqutsinikkut suleriaasaa pissarsiaqaatigissallugu, siulersuisuni siulittaasoq, Niels Thomsen tusagassiuutinut nalunaarummi oqarpoq.

Toke Binzer Nuummi peroriartorami nunatsinni naggueqartoq, Royal Greenland allappoq. Ingerlatseqatigiiffik nangilluni allappoq, Toke Binzer nunani allaniittuni TDC-mi IBM-imilu aqutsisutut misilittagaqartoq.

- Angusaqarusussutitsigut, suliniuteqarnikkut aammalu Kalaallit Nunaanni nukittuumik tunuliaqutaqarnikkut assigiiffeqarpugut – taamaattumik suleqatigiinnissarput qilanaaraara, Niels Thomsen oqarpoq.

Toke Binzer Tusassimi sulilernerminut atatillugu nunatsinnut 2022-mi uterpoq.

- Royal Greenlandimi pisortaanertut atorfinilluni assut tulluusimaarnarpoq, suliffeqarfimmi inuiaqatigiit akornganni ulluinnarni ammalu aningaasarsiornikkut pingaarluinnartumik inissisimammat. Qilanaarpunga suliffeqarfimmi sulisut tamarmik peqatigalugit niuernikkut tunisassiorneq nunat tamalaani Kalaallit Nunaannut iluaqutaasumik naleqartitsisumillu nukittorsassallugu, Toke Binzer oqarpoq.