Amerikamiut præsidentissaata Donald Trumpip ernera, Donald Trump Jr. Nuummut tikeqqammerpoq.

USA-p præsidentissaata Kalaallit Nunaat USA-mut ilanngukkusullugu arlaleriarluni nalunaaruteqarnerata kingunerisaanik taanna tikeraarpoq.

Taassumali ernerata nammineq podcastimini "Triggered with Don Jr."-imi politikikkut isumaqatigiinniariartorluni Kalaallit Nunaannut angalanani erseqqissaatigaa.

Nutaarsiassaqartitsivik AP naapertorlugu podcastip taassuma imassaanik immiussinissani siunertaralugu angalasimavoq.

Donald Trump jr. Nuummi mittarfiup isaariaanit anillammat KNR-ip naatsumik oqaaseqartippaa.

- Maaniinnerput nuannarilluinnarparput. Manna tupinnarluinnartoq takusarlugu takornariarpugut. Maanngarnissarput piffissami sivisulaami oqaluuserinikuuarput. Isikkivik alutornarluinnarpoq.

Ataatannit nalunaarutissaqarpit?

- Inuulluaqqusivoq. Ippassaq oqaloqatigaara, Kalaallit Nunaanniittunut tamanut inuulluaqquseqqusivoq, Donald Trump jr. KNR-imut oqarpoq.

Naalagaaffinngornissamut Nunanullu Allanut Naalakkersuisoqarfimmi pisortap, Mininnguaq Kleistip taassuma tikeraarnera nammineq inuttut tikeraarnerigaa nunatsinnilu naalakkersuisut isumaqatigiissuteqarfigineqarsimanngitsut naalakkersuisut nittartakkaminni erseqqissaapput.

Naalakkersuisoqarfiup pisortaata oqarnera naapertorlugu taassuma tikeraarnera akunnernik sisamanit tallimanut sivisussuseqarnissaa naatsorsuutigineqarpoq.

Donald Trump Jr.-ip maaniinnermini naalakkersuisunik naapitsinnginnissani uppernarsarpaa.

- Naamik, naapitsissanngilagut. Tamanna pilersaarutaanngilaq. Takornariatuinnaq maaniippugut.

Amerikap Kalaallit Nunaannik soqutiginninneranut atatillugu arlaannik oqaaseqarsinnaavit?

- Uanga tassunga oqaaseqarsinnaanngilanga. Allat tassunga tunngatillugu oqaaseqassapput, taanna oqarpoq.

Naalakkersuisut siulittaasuat, Múte B. Egede naak Donald Trump Jr. tikeraaraluartoq Danmarkiliarluni ullumi aamma aallarpoq.

Tamanna Mininnguaq Kleistip Berlingskemut oqaatigaa. Taassuma Múte B. Egede Københavnimi kalaallit sinniisoqarfiani ukiortaami sisamanngorpat ilassinninnissamut ilaatigut qaaqqusisoq nalunaarutigaa.

Assi © : KNR / Irene Jeppson