Nunatsinnit taarsiissuteqarnissamut qanittukkut nalunaaruteqarsinnaanissaq neriuutigigaa

Arnat akuersisinneqaqqaarnagit 1991-ip kingorna spiralilerneqarsimasut nunatsinnit taarsiiffigineqarnissaat, naalakkersuisut suliarileruttorpaat.

Naalakkersuisut siulittaasuat, Jens-Frederik Nielsen taama paasissutissiivoq.

- Maannakkut suliarileruttorparput, qinnuteqaasiornerit allallu qanoq iluseqarsinnaanissaat. Taanna piffissami qaninnerpaami piareersinnaassallugu neriuppunga, Jens-Frederik Nielsen oqarpoq.

Nunatsinni nakorsaaneqarfik arnat 15-it kissaatiginngisaminnik nunatta peqqinnissaqarfimmik 1992-imiilli akisussaalereernerani naartunaveersaaserneqarsimasut ilisimallugu siorna marsimi nalunaarpoq.

Taakkununngalu tamarmik immikkut 300.000 koruuninik taarsiissuteqarnissamut 4,5 millionit koruunit immikkoortinneqarsimasut aningaasaqarnermut taamani naalakkersuisoq oqarpoq. 

Arnat suli amerlanerusut akuerseqqaarnatik naartunaveersaaserneqarsimasut paasineqarpat, naalakkersuisut aamma taakkununnga taarsiissuteqarnissamut piareersimasut, Erik Jensen taamani oqarpoq.

Maannalu naalakkersuisuusut suliaq nangikkaat, Jens-Frederik Nielsen oqarpoq.

- Oorit sinaakkusiornikuuagut. Arnat qassit pineqarnersut eqqarsaatigalugu, aalajangeeqqissaartumik kontomik taasisinnaanngilanga, qanoq imaqarnersoq. Kisianni aallaqqaammut 4,5 millionit koruunioqqooqaaq sinaakkusiunneqarnikuupput. Kisanni suliat qanoqqissaaq ingerlanneqarnissaata qanittukkut suaarutigisinnaanissaa neriuppunga.

Ikiuinissamik sulissuteqartut

Naalakkersuisulli aningaasatiguunnaanngitsoq tapersersuiniartut, Jens-Frederik Nielsenip aamma paasissutissiissutigaa.

- Aamma naalakkersuisunit sulissutigaarput, arnat pineqartut ikilersorneqaatiginikuummassuk, tarnikkut arlaatigullu aamma ikiorserneqarnissaannut suliat isiginiarleruttorpagut,

Danmarkip nunattalu arnanut akuersisinneqaqqaarnatik spiralilerneqarsimasunut utoqqatsernerat Katuami septembarip 24-anni malunnartinneqassaaq.

Taarsiissutissalli, Ikiuiniarneq utoqqatsernerlu pisimasunik allannguisinnaanngitsut, Jens-Frederik Nielsen oqarpoq.

- Siullermik oqarusuppunga, una nassuerneq paasinninnermik aallaaveqartoq. Taassuma ikeq pilersinneqarnikoq mamisinnavianngikkaa nalunngilara. Kisianni neriuppunga, piffissami taartutut misiginarsinnaasumi tuppallersaataalaalaarsinnaassasoq, Jens-Fredeik Nielsen oqarpoq.

Spiralilersuisimaneq pillugu utoqqatsernerup malunnartinneqarnera KNR Radiokkut TV-kkullu  pingasunngorneq septembarip ulluisa 24-anni nalunaaqutaq 14.00 toqqaannartumik aallakaatinneqassaaq.