Trump: Sakkutuunik Europamiit tunuartitsinissamut Kalaallit Nunaat aalajangiisuussasoq
USA Europami sakkutuuminik arlalinnik tunuartitsissaguni “Kalaallit Nunaat aalajangiisuussasoq”, USA-p præsidentia Donald Trump Air Force Onemut ilaalluni ippassaq pingasunngornermi unnukkut oqarpoq.
Europami sakkutuunik arlalinnik tunuartitsinissamut eqqarsaateqartarnersoq, tusagassiortup præsidenti aperaa.
- Suli aalajaginngilanga. Tassani Kalaallit Nunaat aalajangiisorujussuussaaq, taanna oqarpoq “Kalaallit Nunaallu pillugu isumaqatigiissuteqarluanngikkunik” sakkutuunik tunuartitsinissani eqqarsaatigalugu ilanngullugu oqaatigaa.
Nutaarsiassaqartitsivik CNN taama allaaserisaqarpoq.
Trump Tyrkiap illoqarfiisa ilaanni Ankarami Natop ataatsimeersuarnerani ulluni kingullerni peqataavoq.
Tassani USA-p nunatsinnik ”aqutsilernissaanik” kissaatini eqqaaqqippaa.
- Kalaallit Nunaat USA-mut pingaaruteqartorujussuuvoq. Danmarkimulli pingaaruteqarpallaarani, præsidenti pingasunngornermi ataatsimeersuarnermi oqarpoq.
USA naapertuilluanngitsumik pineqarnerarpaa nunalu Natomut akiliivallaartarnerarlugu.
Nunarput tuniniagaanngilaq
Danmarkimi ministeriunerup Mette Frederiksenip (Socialdemokratiet) USA-p Danmarkip nunattalu akuerinngisaanik nunatsinnik tiguaasinnaanera tamanna akuersaarneqarsinnaannginnera ataatsimeersuarnermi aalajangiusimavaa.
Tassani ”Kalaallit Nunaata tuniniagaannginnera” oqaatigaa.
Danmarkip nunarput sakkutuut atorlugit illersornissaanut piareersimanera pillugu toqqaannaq aperineqarami, Mette Frederiksen pingasunngornermi ima akivoq:
- Soorunami Naalagaaffiup Danmarkip illersornissaanut piareersimavugut, Mette Frederiksen Natop pingasunngornerup ullaavani ataatsimeersuarneranut isilerluni oqarpoq.
Naalakkersuisut siulittaasuata Jens-Frederik Nielsenip (D) nunatta tuniniagaannginnera pingasunngornermi oqaatigeqqippaa.
- Ajoraluartumik oqaqqittariaqarpugut: Kalaallit Nunaat tuniniagaanngilaq. Oqartussaaffeqarfiit innarligaassannginnerat, nunat tamalaat inatsisaat namminerlu aalajangiisinnaatitaanerput ataqqineqassapput.
Danmarkip nunanut allanut ministeriata Lars Løkke Rasmussenip (Moderaterne) nunatsinnilu nunanut allanut naalakkersuisuusimasup Vivian Motzfeldtip (D) USA-p nunanut allanut ministeria Marco Rubio USA-milu præsidentip tullersortaa J.D. Vance Washington D.C.-mi ukioq manna januaarimi ataatsimeeqatigaat.
Trumpip nunarput pillugu arlaleriarluni oqaaseqarnerata kingorna ataatsimiinneq piviusunngorpoq.
Ataatsimiinnerup kingorna Løkkep nunatsinnut tunngatillugu USA-p Danmarkillu angisuumik isumaqatigiinngitsoqarnera eqqaavaa suleqatigiissitaliortoqarnerarluguli.
RITZAU
