Uumasut nakorsaat akeqanngitsumik sullissisut Tasiilamukassasut
Uumasut nakorsaat piumassutsiminnik sulisut arlallit Danmarkimiit Tasiilamukassapput qimmillillu qimmiminnik akeqanngitsumik tallimanngorpat misissortitsisinnaapput.
Uumasut nakorsaasa oqarnerat naapertorlugu qimmit kigullunnerat qimmilinnut ajornartorsiutaanerpaavoq.
Taamaattumik kigutinut immikkut ilisimasalimmik uumasut nakorsaanik ilaasoqassaaq, piumassutsiminnik sulisut paasissutissiipput.
Qimmillit uumasut nakorsaat Facebook aqqutigalugu Qimmeqhealth dyrlægeklinik i Slædehundedistriktet-imut allallutik 487148-mulluunniit sianerlutik attavigisinnaavaat.
- Suliniummut akiliisoqarsinnaavoq qimmimilli misissortinnissaannut akissaqanngitsut piumagunik qimmitik akeqanngitsumik misissortissinnaavaat, uumasut nakorsaat KNR-imut taama allapput.
Uumasut nakorsaat tallimanngorpat juulip 10-anni Tasiilamiissapput.
Marloriarluni Tasiilamukartoqassaaq eqqaanullu. Siulliit juulip qulinganni tikittut sapaatit akunnerni marlunni Tasiilamiissapput tulliillu aggustip ulluisa qeqqanni tikikkunik sapaatip akunnerit marluk affarlu Tasiilamiissallutik, suliniummi aqutsisoq Emilie A. Ranberg paasissutissiivoq.
Uumasut nakorsaasa nunaqarfinnukarnissaat kissaatigineqarpat taamaaliorsinnaapput. Paasissutissiissutigineqassaarli, aqutsisoq oqarpoq.
