USA Kalaallit Nunaannut tunngatillugu apeqqummi qanoq iliuuseqarnissamut piffissaliussaqanngilaq.

USA-p præsidentia Donald Trump, tusagassiivimmut NBC Newsimut taama oqarpoq. Tuluit tusagassiiviat Sky News taama allaaserinnippoq.

Aammattaaq Trumpip USA-p isumannaatsuunissaa pissutigalugu Kalaallit Nunaannik pisariaqartitsineranik oqariartuutini ilumoorunnerarlugu oqaatigeqqippaa. 
Præsidentillu oqarnera naapertorlugu, tamanna Europamut aamma iluaqutaassaaq.

- Inuiaqatigiit isumannaatsuunissaat eqqarsaatigalugu Kalaallit Nunaat pisariaqartipparput, tamanna Europamut aamma atuuppoq.

- Nalunngilarsi Europamut ilumoorfiginnittorujussuusunga. Nunatta isumannaatsuunissaanut pisariaqartipparput - massakkorpiaq, Donald Trump oqarpoq.

Ullut 20-t qaangiuppata

Præsidenti Kalaallit Nunaannut tunngatillugu qaqugu iliuuseqassanersoq, tusagassiortumit timmisartumi Air Force One-mi ilaasumit ataasinngornerup unnuaani aperineqarpoq.

Venezuelami illoqarfiit pingaarnersaanni Caracasimi USA-p sakkutuuisa præsidenti Nicolas Maduro  sapaatip-akunnerata naanerani tigusarereeraallu tamanna pivoq.

- Kalaallit Nunaat eqqartornianngilara. Venezuela, Rusland Ukrainelu eqqartorusuppakka, Trump akivoq.

- Kalaallit Nunaat qaammatit marluk qaangiuppata isumakuluutigissavarput. Kalaallit Nunaat ullut 20-t qaangiuppata oqaluuseritigu, nangilluni oqarpoq.

Danmarkimi ministeriunerup, Mette Frederiksenip (S),  USA nunamut inuiannullu, namminneq tuniniarneqarnatik oqariartuuteqartunut, sioorasaarisarunnaarnissaanik, sapaatiummat inuit attaveqaqatigiittarfiisigut qinnuigaa.

Suna tamarmi taava atorunnaassaaq 

USA-p Kalaallit Nunaat saassussinnaaguniuk suut tamarmik atorunnaassasut, ministeriuneq ataasinngornermi oqarpoq.

Nunat taakku marluk illersornissamut isumaqatigiissummut Nato-mut ilaasortaapput.

- Nuna Nato-mut ilaasortaq nunamik allamik saassussippat, taava suut tamarmik unissapput, Mette Frederiksen oqarpoq.

Nato illersoqatigiinnissamut iligiittut qanga pilersinneqarpoq, aammattaarli nunat ilaasortaasut soqutigisaqaqatigiinnissaannik isumaqatigiissuteqarfiuvoq.

Taamaattumik nuna Nato-mut ilaasortap, soorlu USA-p, nunamik allamik Nato-mut ilaasortaasumik, soorlu Kalaallit Nunaannik, saassussippat, nunarsuarmi isumannaallisaanerup tungaatigut aaqqissuussinerup tamarmi aserornissaa ilimanaateqarpoq, Mette Frederiksen oqarpoq.

/ritzau/